«اق جول» پارتياسىنىڭ پلەنۋمى پرەزيدەنتتىك سايلاۋعا پارتيا اتىنان تۇسەتىن ۇمىتكەرلەر بويىنشا ناقتى ءبىر شەشىمگە كەلە المادى دەپ حابارلادى "اق جول" پارتياسىنىڭ باسپا ءسوز قىزمەتى Qamshy.kz اقپارات اگەنتتىگىنە.

تۇركىستان، ماڭعىستاۋ، الماتى وبلىستارىنىڭ، الماتى جانە نۇر-سۇلتان قالالارىنىڭ وكىلدەرى پارتيانىڭ ءتوراعاسىن ۇسىندى. الايدا، پەرۋاشيەۆ ارىپتەستەرىنەن تەك قانا ونىڭ كانديداتۋراسىمەن شەكتەلمەي، وزگە ۇمىتكەرلەرگە مۇمكىندىك بەرۋىن سۇرادى. «پارتيا ليدەرلەرىنىڭ ءتىزىمىن كەڭەيتۋ قاجەت» ەكەنىن ايتىپ، ونىڭ تەك ءبىر اداممەن شەكتەلمەۋى ءتيىس ەكەنىن اتاپ ءوتتى. ول سايلاۋعا ءتۇسىپ ءوز مۇمكىندىگىن سىناپ كورمەكشى بولعان بىرنەشە پارتيالاستارىمەن اقىلداسقانىن حابارلادى. ءبىراق ولاردىڭ ءاتى-جونىن اتامادى.

پەرۋاشيەۆ ءوز شەشىمىن باسقا ۇمىتكەرلەر انىقتالعاننان كەيىن قابىلدايتىنىن ايتتى.

پارتيا ءتوراعاسى ءوز ۇستانىمىن بىلدىرگەننەن كەيىن، سولتۇستىك قازاقستان وبلىسى ادۆوكاتتار پالاتاسىنىڭ ءتوراعاسى، پەتروپاۆل قالاسىنداعى ورىس دراما تەاترىنا ارنالعان «الاش» پەساسىنىڭ اۆتورى ەۆگەنيي كينسەل ءوزىنىڭ كانديداتۋراسىن ۇسىندى. سونداي-اق، «اق جول» پارتياسى جامبىل وبلىستىق فيليالىنىڭ ءتوراعاسى، تاراز قالاسىنىڭ ءۇش مارتە ءماسليحات دەپۋتاتى، بەلگىلى كاسىپكەر، جەرگىلىكتى «اتامەكەن» پالاتاسىن باسقارعان اسان قوشمامبەتوۆ تە نيەتتى ەكەنىن جەتكىزدى.

دەپۋتات قوشمامبەتوۆتىڭ ءوز پىكىرى بار ەكەنىڭ حالىق جاقسى بىلەدى. اسىرەسە، ونىڭ ءماسليحاتتىڭ كوپشىلىگىنە قارسى شىعىپ، بۇرىنعى شەنەۋنىكتەرگە ەمەس، الەۋمەتتىك جاعدايى تومەن وتباسىلارعا كومەك بەرۋدى ۇسىنعانى جونىندە رەسپۋبليكالىق باق-تا جاريالانعان بولاتىن.

بەلگىلى جۋرناليست ارمان سقابىل ۇلى پەرۋاشيەۆ وزدىگىنەن باس تارتقان جاعدايدا پارتيا جاڭا دەموكراتيالىق ءداستۇردى قالىپتاستىرۋ ماقساتىندا ايەل ادامدى ۇمىتكەرلىككە ۇسىنۋى قاجەت دەگەن ويىن ءبىلدىردى. بۇل ۇسىنىس ارىپتەستەردىڭ اراسىندا وتكىر پىكىرتالاس تۋعىزدى.

ناتيجەسىندە، ءۇش ساعاتقا ۇلاسقان داۋدان كەيىن، پلەنۋم كانديداتتار بويىنشا ناقتى ءبىر شەشىمگە كەلە المادى. ازىرگە بەلگىلى بولعانى، ۇمىتكەرلەردىڭ اراسىندا كينسەل مەن قوشمامبەتوۆتەن باسقا، كاسىپكەرلەر، ادام قۇقىعى جونىندەگى تاۋەلسىز ساراپشى مەن جۋرناليست تە بار.

ۇسىنعان: نازەركە لابيحان