الماتى مەن اقتوبە قالاسىنىڭ كاسىپكەرلەرى ورتەنىپ كەتكەن حريستيان شىركەۋىن قالپىنا كەلتىرۋگە مىڭداعان ەۋرو ءبولدى.

الماتى تۇرعىنى ليانا اسادۋللايەۆا پاريجدە ەكى رەت بولعان. ءبىراق "قۇداي انا" شىركەۋىن كورە الماپتى. ءقازىر الماتىلىق شىركەۋگە جولى تۇسپەگەنىنە وكىنەدى.

"ءتۇنى بويى ۇيىقتامادىم. ءورت سوندىرۋشىلەر وتتى وشىرە الادى دەپ ۇمىتتەندىم. پاريجدەن مىڭداعان شاقىرىم الىستا بولسام دا، جانىندا تۇرعانداي سەزىم بولدى. شىركەۋ تولىق ورتەنبەسە ەكەن دەگەن بارلىق الەم جۇرتشىلىعىمەن بىرگەمىن. بولعان جاعداي جانىما باتىپ بارادى..." - دەيدى ليانا.

ليانا – كاسىپكەر-ونەرتانۋشى. قايىرىمدىلىقتان دا الشاق ەمەس. جىل سايىن ءوزىنىڭ كورمە ۇيىمداستىرىپ، ودان تۇسكەن قاراجاتتى جاس سۋرەتشىلەردى قولداۋعا جۇمسايدى. ال ءقازىر ليانا پاريجدەگى شىركەۋدى قالپىنا كەلتىرۋ ءۇشىن مىڭ ەۋرو اۋدارىپتى.

اقتوبەلىك رۋسلان اسەت ۇلى ءپاريجدى دە، شىركەۋدى دە تەك كينودان، سۋرەتتەن كورگەن. ءبىراق ەۋروپاداعى شىعىس ناقىشىندا سالىنعان قۇرىلىستىڭ قۇردىمعا كەتۋى ونى بەي-جاي قالدىرماعان.

"مەن ونەردى سۇيەمىن. بۇل جەردە مەملەكەت، ءدىن، ۇلت دەگەن دۇنيەلەر ماڭىزدى ەمەس. ءبىزدىڭ مىندەت – كەرەمەتتەردى كەلەر ۇرپاق ءۇشىن ساقتاپ قالۋ. مەن قاتتى كۇيزەلدىم. ەندى قازىرگى ۋاقىتتا عيماراتتى قالىپقا كەلتىرۋ ءۇشىن فيزيكالىق، مورالدىق جانە اقشالاي كۇش كەرەك. تۇسىنەمىن، مەنىڭ 1700 ەۋروم تەڭىزگە تامشى تامىزعانداي، ەگەر ءاربىرىمىز قولدان كەلگەن كومەگىمىزدى كورسەتسەك، بولاشاققا باعىتتالعان ءىس بولار ەدى"، - دەيدى رۋسلان.

فرانسيانىڭ مادەني قۇندىلىقتارىن ساقتاۋ مەملەكەتتىك قورى «قۇداي انا» شىركەۋىن قالپىنا كەلتىرۋ ءۇشىن قاراجات جيناي باستادى. "نوتر-دامدى قۇتقارايىق" دەگەن ۇرانمەن مەكەمە سايتىندا ارنايى ءبولىم پايدا بولدى.

قولدانۋشىلارعا 50 مەن 500 ەۋرو اراسىنداعى نەمەسە كەز-كەلگەن قارجى كولەمىن اۋدارۋ ۇسىنىلعان.

ەسكە سالا كەتەيىك، فرانسياداعى "قۇداي انا" شىركەۋى 15ء-ساۋىر كۇنى كەشكى مەزگىلدە ورتكە وراندى. ءقازىر جالىن اۋىزدىقتالىپ، سالقىنداتۋ شارالارى جۇرگىزىلۋدە. ءورت سوندىرۋشىلەر شىركەۋدىڭ ەكى مۇناراسىن، جالپى قاڭقاسىن، ىشىندەگى مادەني قۇندىلىقتاردى امان الىپ قالدى.