گولليۆۋد فيلمدەرىنىڭ ۇزدىك سەنارييلەرىنە بەرگىسىز بۇل جاعداي انگليا ازاماتىنىڭ باسىنان وتكەن. مارتين پيستوريۋس ۇزاق ۋاقىتقا سوزىلعان كومالىق جاعدايدان شىعىپ قانا قويماي، جىلدارعا سوزىلعان ۇيقى كەزىندەگى ساناسىنداعى وزگەرىستەر مەن سەزىمدەرى تۋرالى دا ايتىپ بەردى.

وزگە كۇندەردەن ەش ەرەكشەلەنبەيتىن، كۇندەلىكتى كۇيبەڭمەن ءوتىپ جاتقان ءبىر كۇنى مارتين ءوزىن جايسىز سەزىنەدى. "ءجاي سۋىق تيگىزىپ العان بولارمىن" دەگەن ويمەن ۇيىقتاپ، تىنىعىپ الۋدى ءجون سانايدى. ءبىراق، سول ۇيقىعا كەتكەننەن باستاپ كەيىپكەر سويلەۋ مەن قيمىل-قوزعالىس جاساۋ قابىلەتىنەن ايىرىلادى. تىڭعىلىقتى تەكسەرىس جۇرگىزگەن دارىگەرلەر وعان كوما دەگەن دياگنوز قويادى.

2 جىل ۋاقىت وتكەن سوڭ عانا كەيىپكەر ەسىن جيعان. اقىل-ەسى، ويلاۋ جۇيەسى بارلىعى باستاپقى قالپىنا قايتا ورالادى. ءبىراق، سويلەپ، قيمىل-قوزعالىس جاساي الماعان سوڭ ءوزىنىڭ ويانعانىن اينالاسىنداعىلارعا ايتا دا، كورسەتە دە، سەزدىرە دە المايدى. وسى سەبەپتى دە مارتينگە وزىمەن-وزى بولىپ، تاعى دا باقانداي 10 جىل ۋاقىتتى قۇر وتكىزۋگە تۋرا كەلدى.

مارتين ءوزىنىڭ ون جىل بويى ويىمەن وڭاشا بولعانىن جەتكىزدى. ون جىل بويى دوسى دا، اڭگىمەلەسەتىن سىرلاسى دا ءوز ساناسى بولعان. سولاي جاتىپ، ول ماتەماتيكالىق قيىن ەسەپتەردى شەشكەن ەكەن. ارادا ون جىل وتكەندە عانا ونىڭ قوزعالۋ قابىلەتى ويانا باستاعان. دارىگەرلەر ونىڭ كومادان ويانعانىن ءبىلىپ، دەرەۋ قالپىنا كەلتىرۋ ورتالىعىنا جەتكىزىپ، مارتينمەن جۇمىس جاساي باستاعان.

مىنە، 12 جىلدان كەيىن عانا مارتين ءوزىنىڭ قالپىنا كەلدى. دەندەگەن دەرتتى جەڭىپ، وتباسىن قۇرىپ، وقۋ ءتامامداعان مارتين سياقتى ازاماتتار كەمدە كەم شىعار، ءسىرا؟!

اۋدارعان: داۋرەن سىبانباي