7 مامىر – مەملەكەتتىك مۇددە، ساياسي قاۋىپسىزدىك پەن دەربەستىكتى قورعايتىن وتان قورعاۋشىلار كۇنى. وسىدان 27 جىل بۇرىن، 1992 جىلى 7-مامىردا ق ر قارۋلى كۇشتەرىن قۇرۋ تۋرالى جارلىققا قول قويىلعان بولاتىن. اسكەر ەلدىڭ الەۋەتىن، كۇش-قۋاتىن كورسەتەتىن فاكتورلاردىڭ ءبىرى. كەيبىر ەلدەردە اسكەري سالا، قارۋ-جاراق ءوندىرىسى ەل ەكونوميكاسىنىڭ جەتەكشىسى سالاسى بولىپ سانالادى. اسكەرىنىڭ ايبىنىمەن عانا الەمدىك ساياساتتا ۇلكەندىك قىلىپ وتىرعان اسكەري دەرجاۆالاردى دا كوزىڭىز كورىپ ءجۇر عوي. الايدا، الەمدە اسكەري قۇرىلىمى جوق ەلدەر دە از ەمەس. ءيا، اسكەرى دە، تەمىر قۇرسانعان قارۋ-جاراعى دا جوق ەلدەر بار. Qamshy.kz اقپارات اگەنتتىگى مەرەكە قارساڭىندا اسكەرى جوق الەم ەلدەرىنىڭ ءتىزىمىن نازارلارىڭىزعا ۇسىنۋدى ءجون كورىپ وتىرمىز.  

يسلانديا

يسلانديا ازاماتتارى وزدەرنىڭ قاۋىپسىزدىكتە ەكەندەرىنە تولىق سەنىمدى. اسكەريلەردەن تۇبەگەيلى باس تارتقان. ەلدە بار بولعانى: 130 ادامنان تۇراتىن جاعالاۋ كۇزەتى، 3 كەمە ءپاترۋلى، 3 تىكۇشاق، كاتەر جانە ۇشاق بار. ال اسكەردە قىزمەت ەتكىسى كەلەتىن جاۋجۇرەك يسلانديالىقتار ءۇشىن ەكى جاقتى كەلىسىم نەگىزىندە نورۆەگيا اسكەرىندە اسكەري قىزمەت اتقارۋىنا مۇمكىندىك بار. قاۋىپسىزدىك پەن قورعانىس تۇرعىسىندا يسلانديا تولىقتاي ناتو-نىڭ كومەگىنە جۇگىنۋگە ۇيرەنىپ قالعان.

پاناما

پاناما ۇزاق جىلدار بويى ەسىرتكى تاسىمالىمەن اينالىساتىن اسكەريلەردىڭ باسقارۋىندا بولعان مەملەكەت. اقش-قا گەروين مەن كوكايندى توننالاپ تاسىمالداۋشىلار امەريكا تاراپىنا پاناما كانالىن تارتىپ الۋمەن دە ءقاۋىپ توندىرگەن. ناتيجەسىندە، جەرگىلىكتى اسكەري بيلىك 1989 جىلى قۇراما شتاتتار اسكەرىنەن جەڭىلىپ، بيلىكتەن كەتىپ تىندى. ەلدىڭ كەلەسى پرەزيدەنتى وسى جايلاردىڭ بارلىعىن ەسكەرە وتىرىپ، ەلدە قارۋلى كۇشتەر قۇرۋعا تىيىم سالاتىن زاڭ قابىلداعان.

ليحتەنشتەين

1886 جىلدان باستاپ بۇل كىشكەنتاي مەملەكەتتە اسكەري جۇيە بولعان ەمەس. 80 ادامنان تۇراتىن اسكەرگە كەتەتىن قارجى ءوزىن-وزى اقتاماعاندىقتان اسكەردى تاراتۋ تۋرالى شەشىم شىعارىلعان. ءدال قازىرگى ۋاقىتتا ليحتەنشتەين بيلىگى قورعانىس ماسەلەسىندە ءوزىنىڭ مىقتى كورشىلەرى گەرمانيا، اۆستريا جانە شۆەيسارياعا ارقا سۇيەيدى.

اندوررا

بۇل ەلدىڭ قارۋلى كۇشتەر قۇرىلىمىن بار-جوعى 1300 ادامنان تۇراتىن ۇلتتىق پوليسيا قۇرايدى. مەملەكەتكە ءقاۋىپ تونگەن جاعدايدا اندوررا ازاماتتارى پوليسيا وتريادتتارىنا قوسىلۋعا قۇقىلى. ال قورعانىس قالقانى رەتىندە اندوررا سولتۇستىكتەگى كورشىسى فرانسياعا تولىقتاي سەنىم ارتادى.

كوستا-ريكا

1948 جىلى ارالدا ورنالاسقان اتالمىش ەلدە ازامات سوعىسى اياقتالدى. سوعىس اياقتالا سالىسىمەن ەلدەگى اسكەر تاراتىلعان. جاڭا سايلانعان پرەزيدەنت حوسە فەررەرا كوستا-ريكا اسكەرىنىڭ شتابى ورنالاسقان عيمارات قابىرعاسىن ءوز قولىمەن قۇلاتقان. ەلدىڭ قارۋلى كۇشتەرىنىڭ جالپى قۇرىلىمى 10 مىڭ ادامنان تۇراتىن پوليسيا، ۇلتتىق گۆارديا مەن جاعالاۋ كۇزەتىنەن عانا تۇرادى. سوعىس ءقاۋىپ تونە قالعان جاعدايدا اقش-تىڭ كومەگىنە جۇگىنە الادى.

سولومون ارالدارى

جوعارى دا اتالعان كوپتەگەن ەلدەردەگى سەكىلدى بۇل ەلدە دە اسكەري قىزمەتتى از ساندى پوليسيا اتقارعان. ءبىراق، 1998 جىلعى قارۋلى كوتەرىلىستەردەن كەيىن پوليسيا ورگانى دا تاراتىلعان. ءقازىر سولومون ارالدارىنىڭ تىنىشتىعىنا تەك جاعالاۋ كۇزەتى عانا جاۋاپتى. ءقاۋىپ تونە قالعان جاعدايدا الەۋەتتى كورشىسى اۆستراليانىڭ كومەگىنە جۇگىنەدى.

تۋۆالۋ

بۇل ەلدە اسكەر، ازاماتتىق گۆارديا، جاعالاۋ كۇزەتى سياقتى قىزمەتتەر مۇلدە بولعان ەمەس. قازىرگى ۋاقىتتا ميگرانتتار ماسەلەسىمەن اينالىساتىن 81 ادامنان قۇرالعان مەملەكەتتىك ۇيىم بار. وسى ۋاقىتقا دەيىن تۋۆالۋعا ەشكىم شابۋىل جاساپ كورمەگەن، ال ءقاۋىپ تونە قالعان جاعدايدا تۋۆالۋ بيلىگى ناتو اليانسىنان اسكەري كومەك الۋعا قۇقىلى.