قازاقستان پرەزيدەنتىنە ۇمىتكەر ءامىرجان قوسانوۆ فەيسبۋك الەۋمەتتىك جەلىسىندەگى پاراقشاسى ارقىلى تىكەلەي ەفيرگە شىقتى دەپ حابارلايدى Qamshy.kz  اقپارات اگەنتتىگى. تىكەلەي ەفير 40 مينۋتقا سوزىلىپ، ونى 1000-نان اسا فەيسبۋك قولدانۋشىلارى ونلاين كورىپ وتىردى.

ەفير بارىسىندا ءامىرجان قوسانوۆ قازاقستانداعى قوردالانعان ماسەلەلەردى تىلگە تيەك ەتىپ، قازىرگى بيلىكتىڭ  اۆتوريتارلىق جۇيەسىنە تۇپكىلىكتى قارسى ەكەنىن دە اشىق ايتتى.

«...مەنىڭ وسى ۋاقىتقا دەيىن تۇسىنگەنىم ءبىر نارسە. بۇگىن مەن سونى سايلاۋ الدىندا اعىمنان جارىلىپ ايتقىم كەلەدى. قازاقستانداعى كوپ بالالى انالاردىڭ جاعدايىنان باستاپ، ەل ەكونوميكاسىنىڭ وليگارحتارعا ساتىلىپ كەتكەنىنە دەيىنگى كوپتەگەن قوردالانعان پروبلەمالاردى شەشۋدىڭ ءبىر عانا جولى بار. ول مەحانيزم ساياسي رەفورما دەپ اتالادى. ونىڭ نەگىزگى باعىتى "ءاي دەيتىن اجە، قوي دەيتىن قوجا جوق" قازرىگى بيلىكتى تاۋبەسىنە كەلتىرەتىن حالىقتىق باقىلاۋ. ياعني، حالىق اۋىل اكىمىنەن باستاپ، قالا، اۋدان، وبلىس اكىمدەرىن جانە مينيسترلەر مەن دەپۋتاتتاردى، پرەزيدەنتتى ءبارىن ءوزى سايلاۋى كەرەك. ءتىپتى سوتتاردى دا حالىق سايلاعانى دۇرىس. مىنە، سول كەزدە عانا ءبىزدىڭ قوعام وزگەرەدى»  دەدى، قوسانوۆ.

 سونداي-اق، ول ءوز سوزىندە قازىرگى كونستيتۋسياعا تۇبەگەيلى وزگەرتۋ ەنگىزۋ كەرەكتىگىن اتاپ ءوتتى.

«... 95 جىلدان باستاپ حالىقتان گورى ءبىر ادامنىڭ سويىلىن سوعىپ جۇرگەن كونستيتۋسياعا تۇبەگەيلى وزگەرىس ەنگىزۋ كەرەك. ءبىزدىڭ اتا زاڭىمىزدا: "قازاقستان حالقى مەملەكەتەگى بيلىكتىڭ بىردەن-بىر يەسى جانە قاينار كوزى" دەپ جازىلعان. ءبىراق ءسوز جۇزىندە ولاي ەمەس. سوندىقتان ءبىز بارلىق زاڭدارىمىزدى، بارلىق ەكونوميكالىق شەشىمدەرىمىزدى كونستيتۋسيامىزدىڭ وسى بابىنا سايكەستەندىرۋىمىز قاجەت. جەرمەن ونىڭ بايلىعىن قازاقستان حالقىنىڭ تولىقتاي مەنشىگىنە اينالدىرۋىمىز قاجەت. بۇل – ۇلكەن ماسەلە. بۇل ماسەلەنىڭ وڭ شەشىمىن تابۋىنا ءبىرىنشى كەزەكتە وليگارحتار قارسى، كەزىندە جەردىڭ تابيعي بايلىقتارىنا يە بولىپ قالعان بايشەكەشتەر قارسى، قالتالىلار قارسى. سوندىقتان بىزگە وليگارحتاردىڭ ەمەس، حالىقتىڭ قامىن ويلايتىن پرەزيدەنت، وليگارحتاردىڭ ەمەس حالىقتىڭ قامىن ويلايتىن ۇكىمەت كەرەك» دەپ ايتتى.

ميات كاشىباي