الەۋمەتتىك جەلىلەر ارقىلى تىكەلەي ەفيرگە شىعىپ، ءدال وسىلاي مالىمدەگەن ءامىرجان قوسانوۆ قازاقستان پرەزيدەنتىنە ۇمىتكەر رەتىندە تىركەلگەن ساتتەن باستاپ ءوزىن سىناي باستاعاندارعا جاۋاپ بەردى دەپ حابارلايدى Qamshy.kz اقپارات اگەنتتىگى.

20 جىلدان بەرى ءوزىن وپپوزيسيا وكىلى دەپ ەسەپتەيتىن ساياساتكەر باسقا-باسقا ەمەس ءوزىن سىناۋشىلاردىڭ باسىم بولىگى ءبىر كەزدەرى دوستىق قارىم-قاتىنىستا بولىپ، ءبىر مۇددە جولىندا جۇرگەن زامانداستارى ەكەنىنە ناليتىنىن دا جاسىرمادى.

«وكىنىشكە قاراي جاۋ جاعادان العاندا، ءبورى ەتەكتەن دەيدى. مەن تۋرالى «اقوردانىڭ ادامى، بيلىكتىڭ جوباسى» دەگەن الىپ-قاشپا اڭگىمەلەر شىعىپ جاتىر. مەن وسى ءسوزدى بيلىكتەن، بيلىكتىڭ جاندايشاپتارىنان ەستيمىن بە دەپ ەدىم، بۇل ءسوزدى وپپوزيسيادا، دەموكراتيا قاتارىندا بىرگە جۇرگەن ازاماتتاردان ەستىپ جاتىرمىن. سوعان مەن ناليمىن، كىمدەرمەن مەن دوس بولدىم، كىمدەرمەن بىرگە ءجۇردىم، كىمدەرمەن بىرگە وسى رەجيمگە قارسى كۇرەستىم دەپ. ەندى سولارعا جاۋاپ بەرىپ كەتەيىن. مەن اقوردانىڭ ەمەس، اكەم مەن شەشەمنىڭ جوباسىمىن. مەنىڭ ارتىمدا ەشقانداي وليگارح نەمەسە ساياسي قۇرىلىم تۇرعان جوق» دەدى.

سونىمەن قاتار قوسانوۆ وزىنە نەگە ءدال وسىنداي پىكىرلەر ايتىلىپ جاتقانىنا دا توقتالىپ ءوتتى. ونىڭ ويىنشا، سىناپ جۇرگەندەر بۇل جاعدايدى ءوزىنىڭ  20 جىل بويى وپپوزيسيادا جۇرسە دە، ساياسي قۋعىنعا ۇشىراماي، ەلدە تۇرىپ جاتقانىمەن بايلانىستىرادى ەكەن. ءبىراق قوسانوۆتىڭ ايتۋىنشا 1997 جىلى وپپوزيسياعا وتكەن ساتتەن باستاپ، ول بيلىك تاراپىنان كوپتەگەن قىسىم كورىپتى.

«1997 جىلى وپپوزيسياعا وتكەننەن كەيىن 1998 جىلى مەنى اياعى اۋىر ايەلىممەن بىرگە ساباپ كەتتى. سول كەزدە ايەلىمنىڭ قۇرساعىنداعى نارەستە ءۇشىن قاتتى الاڭداعان ەدىم. الايدا ول امان-ەسەن ومىرگە كەلىپ، وسى كۇنگە جەتتى. شۇكىر. سونداي-اق، مەن ۇستىمنەن ءىس قوزعالىپ، سوتتالعانمىن. 2003 جىلى پرەزيدەنتتىڭ (رەد. ن.نازاربايەۆ) ۇلكەن كۇيەۋ بالاسى راحات الييەۆ قۇزىرلى ورگانداردى باسقارىپ وتىرىپ، مەنىڭ ۇستىمنەن قىلمىستىق ءىس قوزعادى. مەنى ناقتى سوتتايتىنداي بولدى. ءبىراق حالىقارالىق ۇيىمدار جانە دجون ماككەين سياقتى سەناتور اراشا ءتۇستى. بۇدان بولەك ءۇيىمنىڭ ەسىگىن بەتونداپ، تەرەزەسىنەن تاس اتقان كەزدەر دە بولعان. ءتىپتى مەنىڭ جەرلەۋ ءراسىمىمدى تولەپ، مەنىڭ ۇيىمە جەرلەۋ اگەنتتىگىنىڭ قىزمەتكەرلەرى كەلىپ، ماعان قوسانوۆتى قاي ءدىن بويىنشا جەرلەيمىز دەگەن. مەنىڭ كەڭسايدا جاتقان قارىنداسىمنان «ءامىرجان، سەنى ىزدەپ وتىرمىن» دەپ جەدەلحات ۇيىمداستىرعانى تاعى بار. مەن ونىڭ ءبارىن كوردىم. مەن بيلىكتىڭ مۇنداي قۇيتىرقى ارەكەتتەرىنەن قورىقپايمىن» دەپ ايتتى.

قوسانوۆ باسىنان وتكەن بۇل جاعدايلاردىڭ بارلىعىن وزىنە «بيلىكتىڭ ادامى» دەپ جالا جاۋىپ جاتقاندارعا جاۋاپ رەتىندە ايتىلعانىن تىلگە تيەك ەتتى.

«مەن بيلىكتىڭ ادامى بولسام، ءدال وسىنداي تەپەرىشتى كورەر مە ەدىم؟ كەزىندە زامانبەك، التىنبەك، باتىرحاندى ەسكە العان ميتينگتەردى  دە، جاڭاوزەندەگى نارازىلىق اكسيالارىن دا مەن جۇرگىزدىم، سول ءۇشىن 15 تاۋلىكتەن ەكى رەت اباقتىعا جابىلىپ، اشتىق جاريالاعان قازاقپىن. سوندىقتان ماعان ءدال بۇلاي «بيلىكتىڭ ادامى» دەپ  جالا جابۋ نەگىزسىز» دەپ مالىمدەدى.