ۇلتتىق بانك ءتوراعاسىنىڭ ورىنباسارى ولەگ سمولياكوۆ "7-20-25" يپوتەكاسى ۇلگىسىندە اۆتونەسيە باعدارلاماسىن ىسكە اسىرماۋدىڭ سەبەبىن ءتۇسىندىردى دەپ حابارلايدى Qamshy.kz اقپارات اگەنتتىگى Sputnik قازاقستان cايتىنا سىلتەمە جاساپ.

ونىڭ ايتۋىنشا، باس كەزىندە "باسپانا" كومپانياسى "7-20-25" ۇلگىسىندە يپوتەكامەن قالاي جۇمىس ىستەسە، تۋرا سولاي اۆتوكرەديتتى دە رەتتەيدى دەگەن جوسپار بولعان. الايدا بانك باسشىلىعى جاڭا باستامانىڭ ورنىنا قازىرگى 4 پروسەنتتىك اۆتوكرەديت باعدارلاماسىن كۇشەيتكەن دۇرىس دەگەن شەشىمگە كەلدى. 

"ەندى، "باسپانا" وسى ماسەلەگە ارالاسپايدى. بۇگىندە 4 پروسەنتتىك اۆتوكرەديت باعدارلاماسى بار. ونىمەن قازاقستاننىڭ دامۋ بانكى جانە تاعى بىرنەشە بانك اينالىسادى. ءبىز وسى باعدارلامانى قارجىلاندىراۋ كولەمىن ارتتىراتىن بولامىز "، - دەدى سمولياكوۆ.

ۇلتتىق بانكتىڭ جوسپارىنا سايكەس، قوسىمشا قارجى قازاقستاننىڭ دامۋ بانكىنىڭ وبليگاسيالارىن ساتىپ الۋ ارقىلى تارتىلادى. بۇگىندە ونداي مەحانيزم بار.     

"ءسويتىپ، قوسىمشا قارجىنى 4 پروسەنتتىك اۆتوكرەديت باعدارلاماسىنا جىبەرۋگە بولادى. نەگىزى، باسقارما شەشىمىنىڭ جوباسى قابىلداندى. بىلايشا ايتقاندا، ءبىز دايىنبىز. باسىندا "7-20-25" ۇلگىسىندە جاڭا ءبىر مەحانيزمدى ەنگىزۋدى ويلادىق. ءبىراق 4 پروسەنتتىك اۆتوكرەديت تۇرعاندا جاڭا مەحانيزمنىڭ قاجەتى قانشا؟ سول سەبەپتى ءبىز قازىرگى باعدارلامانى كۇشەيتكەن دۇرىس دەپ شەشتىك"، - دەيدى سمولياكوۆ.

ايتا كەتەيىك، اعىمداعى جىلى 30 قاڭتاردا بولعان ۇكىمەت وتىرىسىندا ۇلتتىق بانكتىڭ سول كەزدەگى باسشىسى دانيار اقىشيەۆ "7-20-25" يپوتەكالىق باعدارلاماسى ۇلگىسىندە اۆتوكرەديت بەرۋگە بولاتىنىن مالىمدەگەن. بانك اتالعان باستامانى قىسقا ۋاقىتتىڭ ىشىندە ىسكە اسىرۋعا دايار بولعان. قازاقستاننىڭ تۇڭعىش پرەزيدەنتى نۇرسۇلتان نازاربايەۆ تا اتالعان باستامانى قولدادى.

25 اقپاندا دانيار اقىشيەۆ ۇلتتىق بانك ءتوراعاسى قىزمەتىنەن بوساتىلدى. ونىڭ ورنىنا ەربولات دوسايەۆ كەلدى. ال 9 ساۋىردە د.اقىشيەۆ قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆتىڭ كومەكشىسى بولىپ تاعايىندالدى.

ۇسىنعان: ماقپال سەمباي