پرەزيدەنت قاسىم-جومارت توقايەۆ اقتوبە وبلىلىسىنداعى جولدىڭ جارتىسىنا جۋىعىنىڭ ساپاسى سىن كوتەرمەيتىنىن ايتىپ، جاۋاپتىلاردى سىنعا الدى دەپ حابارلايدى Qamshy.kz اقپارات اگەنتتىگى tengrinews.kz سايتىنا سىلتەمە جاساپ.

پرەزيدەنت ۇكىمەت پەن وبلىس اكىمدىگىنە 2025 جىلعا دەيىن وڭىردەگى جول جاعدايىن جاقسارتۋدى تاپسىردى.

"2025 جىلعا دەيىن رەسپۋبليكالىق جانە جەرگىلىكتى جەرلەردەگى بارلىق جولداردى رەتكە كەلتىرۋ قاجەت. بۇل – اۋقىمدى ءارى ستراتەگيالىق ماڭىزعا يە جوبا. وسى باعىتتا "اقتوبە-الماتى" جولىن قايتا قالپىنا كەلتىرۋ جۇمىستارى باستالدى، كولىك قوزعالىسى مەن ترانزيت كولەمىنىڭ ارتۋىنا بايلانىستى "اقتوبە-قاندىاعاش" باعىتىنداعى جولدىڭ دا جوندەۋ جۇمىستارىن جەدەلدەتۋ قولعا الىندى. سونىمەن قاتار 2025 جىلعا دەيىن "نۇرلى جول" باعدارلاماسىنىڭ نەگىزىندە "اقتوبە-حرومتاۋ"، "قاندىاعاش-شالقار-ىرعىز "باعىتىنداعى جولداردى دا قايتا قالپىنا كەلتىرۋ قاجەت. اتالعان جوبالاردى قارجىلاندىرۋدى جەدەلدەتۋ شارالارى جۇرگىزىلسىن. بۇل مەنىڭ ۇكىمەتكە بەرەتىن تاپسىرمام"، - دەدى پرەزيدەنت اقتوبە جۇرتشىلىعىمەن كەزدەسۋىندە.

مەملەكەت باسشىسى ۇكىمەتكە جانە جەرگىلىكتى اتقارۋشى ورگاندارعا ساپالى ءارى قولجەتىمدى تۇرعىن ءۇي سالۋدى، حالىقتىڭ تابىسىن ارتتىرۋدى، ىسكەرلىك بەلسەندىلىكتى قولداپ، ورتا تاپ قالىپتاستىرۋدى، سونداي-اق، ءوڭىردىڭ كولىك-ترانزيتتىك الەۋەتىن دامىتۋ جونىندە قاجەتتى شارالار قابىلداۋدى تاپسىردى.

اۋدارعان: داۋرەن سىبانباي