سايرام اۋداندىق سوتى ادام ولىمىنە كۇدىكتى رەتىندە 1959 جىلى دۇنيەگە كەلگەن وزبەكستان ازاماتىنا قاتىستى ءىس قوزعادى. كۇدىكتىگە ق ر قىلمىستىق كودەكسىنىڭ 99-بابى بويىنشا "قاساقانا ءولتىرۋ" ايىبى تاعىلىپ وتىر دەپ جازادى Qamshy.kz اقپارات اگەنتتىگى Sputnik سايتىنا سىلتەمە جاساپ.

كۇدىكتى ادام ولتىرگەن جەرىندە قازا تاپقان ازاماتتىڭ تۋىسقاندارىنا ۇستالىپ قالعان. ال ءقازىر ءوزى اۋرۋحانانىڭ رەانيماسيا بولىمىندە جاتىر.

بىزگە بەلگىلى بولعانىنداي، وزبەك جىگىت تۇركىستان وبلىسى، سايرام اۋدانىنا جۇمىس بابامەن تۇراقتى كەلىپ-كەتىپ جۇرەدى ەكەن. ول جەرگىلىكتى تۇرعىنداردىڭ ءبىرىنىڭ قولىندا جۇمىس ىستەپ جاتقان. سايرامعا جاساعان سوڭعى ساپارىندا جاساعان قىزمەتى ءۇشىن ەسەپتەسپەك بولعان كۇدىكتىگە قازا تاپقان ازامات ەڭبەكاقىسىن بەرۋدەن باس تارتقان-مىس.

سول ارادا داۋ تۋىپ، سوڭى توبەلەسكە ۇلاسقان. ىزاعا بۋلىققان وزبەك جىگىت قوجايىنىن تەمىرمەن اياماي ۇرىپتى. ايعاي-شۋدى ەستىپ ۇيدەن شىققان قوجايىننىڭ ۇلى دا توبەلەسكە قويىپ كەتەدى. سول جەردە وزبەكستان ازاماتى اۋىر جاراقات العان.

ول اۋىر جاعدايدا اۋداندىق اۋرۋحانانىڭ جانساقتاۋ بولىمىنە جەتكىزىلدى. قازىرگى ۋاقىتتا كۇدىكتىنى تەرگەۋ جۇمىستارى پوليسيا قىزمەتكەرلەرىنىڭ نازارىندا اۋرۋحانادا جالعاسىپ جاتىر.

قازا تاپقان ازاماتتىڭ ۇلىنا قاتىستى دا قىلمىستىق ءىس قوزعالعان. ول زاڭ الدىندا ادام دەنساۋلىعىنا زالال كەلتىرگەنى ءۇشىن جاۋاپ بەرمەك.

اۋدارعان: ادىلەت مادەنيەت