بۇل تۋرالى بۇگىن وڭىرلىك كوممۋنيكاسيالار قىزمەتىنىڭ الاڭىندا وتكەن بريفينگتە «امانات» ازاماتتىق پلاتفورماسىنىڭ ماڭعىستاۋ وبلىستىق شتابىنىڭ مۇشەلەرى مالىمدەدى.

«امانات» ازاماتتىق پلاتفورماسىنىڭ رەسپۋبليكالىق كەڭسەسى 30 ساۋىردە ءوز جۇمىسىن باستاعان. ۇيىم قۇرامىندا جۋرناليستەر، قوعام بەلسەندىلەرى مەن جاستار قاۋىمى بار جوبالىق كەڭسە سايلاۋ اياقتالعانعا دەيىن جۇمىس جاسايدى. رەسپۋبليكانىڭ ءار ايماعىنان قۇرىلعان كەڭسە كەزەكتەن تىس  پرەزيدەنت سايلاۋىنا ءوز قاتارلارىنان ون مىڭعا جۋىق باقىلاۋشى شىعارادى. وسىلايشا، ەلىمىزدەگى ءار سايلاۋ ۋچاسكەسىنە «اماناتتىڭ» اتىنان ءبىر ادامنان بەكىتىلەدى. بۇل بەلسەندى ەرىكتى تۇردە ىستەيتىن جۇمىستىڭ ءبىر عانا باعىتى. ولار سونداي-اق پرەزيدەنت سايلاۋىنىڭ ءادىل ءوتۋىن باقىلاپ، سايلاۋالدى دايىندىق، الەۋمەتتىك جەلىلەردە داۋىس بەرۋشىلەردى اقپاراتتاندىرۋ جۇمىسىمەن دە اينالىسادى.

ماڭعىستاۋ وبلىسىندا سايلاۋدىڭ زاڭ اياسىندا ءوتۋىن قاداعالايتىن 223 تاۋەلسىز باقىلاۋشى دا «امانات» ازاماتتىق پلاتفورماسىنىڭ وڭىرلىك شتابىندا ءدارىس الۋدا. ولاردى  سايلاۋ بارىسىن باقىلاۋ جۇمىستارىنا باۋلۋ ءۇشىن شتابتان 10 ءموبيلدى كاپيتان بولىنگەن. پرەزيدەنتىككە ۇمىتكەر «نۇر وتان» پارتياسى جانە «قازاقستان حالىقتىق كوممۋنيستىك» پارتياسىنىڭ شتاب وكىلدەرىمەن كەزدەسۋ ۇيىمداستىرعان «اماناتتىقتار» قاراقيا اۋدانىندا بولعان ساپارىندا باقىلاۋشىلارمەن كەزدەستى. باقىلاۋشىنىڭ قانداي قىزمەتتەر اتقاراتىنى جازىلعان مەتوديكالىق نۇسقاۋلىق بلاكنوتى ازىرلەنىپ، ساراپشىلىق باعىتتا دايىنداۋ جۇمىستارى جالعاسىن تابۋدا. ايتا كەتەيىك، ازاماتتىق پلاتفورما جۇمىسىنا  تارتىلعان ازاماتتاردىڭ ەشقايسىسى ساياسي پارتيالارعا جاقتاس بولا المايدى.

«كەزەڭ ارالىق قىزمەت بولعاندىقتان، از ۋاقىت ىشىندە وبلىس بويىنشا جۇرگىزىلگەن جۇمىستىڭ الۋان باعىتتارىنا قاراماستان ءبىزدىڭ كوماندا ءوزىنىڭ العاشقى ناتيجەلەرىنە قول جەتكىزدى دەپ ەسەپتەيمىن. ءاربىر ازامات سايلاۋدا ءوز تاڭداۋىن جاساۋى كەرەك»، - دەدى «امانات» ازاماتتىق پلاتفورماسىنىڭ وبلىستىق شتاب جەتەكشىسى عاليا جالعاسباي.

سونداي – اق، بريفينگتە بۇل سالانىڭ نەگىزگى 5 باعىتى تۋرالى تۇسىنىك بەرىلدى. العاشقىسى، سايلاۋعا دەيىنگى جانە كەيىنگى قوعامداعى احۋالعا تاۋەلسىز مونيتورينگ جۇرگىزەتىن «تەڭدىك» باعىتى. ەكىنشى، سايلاۋشىلاردىڭ ءوز قۇقىعىنان اقپاراتتاندىرىلۋى. ءۇشىنشى، ماڭىزى ەرەكشە «ادىلدىك» باعىتى سايلاۋدىڭ اشىق ءارى ءادىل ءوتۋى ءتيىس دەگەن ۇستانىم اياسىندا باقىلاۋشى قىزمەتىن اتقارادى. ءتورتىنشىسى، «كەلىسىم» باعىتى قوعامداعى پىكىرلەردىڭ ءارتۇرلى بولعانمەن، ورتاق كەلىسىمگە كەلىپ، حالىق ءۇشىن قىزمەت ەتەتىن پرەزيدەنتتى تاڭداۋدى كوزدەيدى. بەسىنشى، «امانات» باعىتى بويىنشا كەز-كەلگەن تۇلعا بولاشاق پرەزيدەنتكە ءوزىنىڭ اماناتىن، ياعني ارمان-تىلەگىن بەينە جازبا ارقىلى جولداي الادى.