ماڭعىستاۋ وبلىسىندا ءورت وقيعاسى 12 پايىزعا ازايعان. مۇنى وڭىرلىك كوممۋنيكاسيالار الاڭىندا وتكەن بريفينگتە وبلىستىق توتەنشە جاعدايلار دەپارتامەنتىنىڭ باسشىسى بازاربايەۆ كۋانار بەكەن ۇلى مالىمدەدى.

الدىن-الۋ شارالارىنا سايكەس، وتكىزىلگەن ۇگىتتەۋ-پروفيلاكتيكالىق جۇمىستارى بۇگىنگى تاڭدا ءوز ناتيجەسىن بەرۋدە، دەيدى ماماندار. ماسەلەن، 2018 جىلدىڭ  سوڭعى بەس ايىندا 107 ءورت وقيعاسى تىركەلسە،  جىل باسىنان بەرى وبلىس اۋماعى بويىنشا 94 ءورت وقيعاسى بولعان. دەرەككوزدەرگە سۇيەنسەك، كوبىنە تۇرعىن ۇيلەر ورتەنگەن. وتتى ابايسىز قولدانۋ، پەشتىڭ اقاۋلىعىنان، ەلەكتر جەلىلەرى مەن قۇرالدارىن پايدالانۋدا ءورت قاۋىپسىزدىك ەرەجەلەرىن ساقتاماۋدان جانە بالالاردى قاراۋسىز قالدىرۋ سالدارىنان 39 وقيعا ورىن الدى.  ال، وسى ىسپەتتى  جاعدايعا تاپ بولعان 28 اۆتوكولىك تىركەۋدە تۇر. بۇل وتكەن جىلمەن سالىستىرعاندا 24 پايىزعا ازايعان. بيىلعى جىلدىڭ  5 ايىندا  ماماندار461 رەت ءورت سوندىرۋگە بارعان. بۇل كورسەتكىش الدىڭعى جىلمەن سالىستىرعاندا 11 پايىزعا كوپ.  2018 جىلى 3 ادام قۇتقارىلىپ، 99 ادام كوشىرىلسە، بيىل 15ادام قۇتقارىلىپ، 189 ادام ءقاۋىپسىز جەرگە كوشىرىلگەن.

«ءورت – ءتىلسىز جاۋ. ونى الدىن-الا بولجاپ ءبىلۋ مۇمكىن ەمەس. جىل سايىن وڭىردە  قالا جانە اۋدان اكىمدىكتەرىمەن بىرىگىپ وبلىس اۋماعىندا ءورت وقيعاسىن بولدىرماۋ جانە  ورماندى-دالادا ءورت قاۋىپسىزدىگىن قامتاماسىز ەتۋ بويىنشا ءىس-شارالار جوسپارى  بەكىتىلەدى. وسى ورايدا، مۇنايلى اۋدانىندا «ءورت ءسوندىرۋ» ءبولىمىنىڭ قۇرىلىسى باستالماق. 60 ادامدى جۇمىسپەن قامتيتىن جوباعا رەسپۋبليكالىق بيۋدجەتتەن 530 ملن تەڭگە بولىنگەن » ،- دەدى ماڭعىستاۋ وبلىستىق توتەنشە جاعدايلار دەپارتامەنتىنىڭ باسشىسى قۋانار بەكەن ۇلى.

ءورت وقيعالارىن الدىن-الۋ ماقساتىندا كوپتەگەن شارالار قولعا الىنعان. بۇقارالىق اقپارات قۇرالدارىندا، تەلەارنالار مەن  راديولاردا حابارلامالار بەرىلسە، قوسىمشا ءورت قاۋىپسىزدىك سەنبىلىكتەرى ۇيىمداستىرىلىپ، تۇرعىن ءۇي يەلەرىنە جادناما، بۋكلەتتەر جانە نۇسقاۋلىقتار تاراتىلعان.  وبلىس كولەمىندە، اۋدانداردىڭ قوعامدىق ورىندارىندا جانە ادامدار كوپ شوعىرلاناتىن ورىنداردا ءورت قاۋىپسىزدىك تالاپتارىن تۇسىندىرەتىن 22 بيلبورد ورناتىلىپ، ءبىلىم بەرۋ وشاقتارىندا دا اتالعان تاقىرىپ اياسىندا ساباقتار وتكىزىلگەن.