قازاقستان پرەزيدەنتى اكىمشىلىگىنىڭ جەتەكشىسى باقىتجان ساعىنتايەۆ بيلىكتەن باسپانا سۇراعان انالاردىڭ تالابىنىڭ زاڭدى-زاڭسىزدىعىن قاراستىراتىن مالىمدەدى. بۇل تۋرالى ول 3 ماۋسىمدا نۇر-سۇلتاندا اقوردا مەن ۇكىمەت ءۇيىنىڭ ماڭىنا كەلىپ نارازىلىق بىلدىرگەن انالاردى قابىلداعان كەزدە ايتتى دەپ جازادى Qamshy.kz اقپارات اگەنتتىگى ازاتتىق راديوسىنا سىلتەمە جاساپ.

ساعىنتايەۆتىڭ سوزىنشە، 4 ماۋسىمدا ۇكىمەت ۇيىندە مينيسترلەر مەن ۇكىمەت قىزمەتكەرلەرى باسپانا تالاپ ەتكەن انالارمەن كەزدەسىپ، ماسەلەلەرىن تالقىلايدى.

- ماسەلەنى ايعايمەن ەمەس، سابىرمەن شەشۋ كەرەك. ول ءۇشىن ءار پروبلەمانى تالقىلايمىز. ول تالاپ زاڭدى ما، زاڭسىز با، سونى قارايمىز. شەشىمى تابىلاتىن ماسەلەنى "تابىلادى" دەيمىز، شەشىمى تابىلمايتىن ماسەلە بولسا، "تابىلمايدى" دەپ ايتامىز. جالعان ۋادە بولمايدى، - دەدى ساعىنتايەۆ.

3 ماۋسىمدا نۇر-سۇلتاندا ءبىر توپ (ناقتى سانى بەلگىسىز) انا اقوردا مەن ۇكىمەت ءۇيى ماڭىنا بارىپ، قازاقستان پرەزيدەنتى قاسىم-جومارت توقايەۆ پەن پرەمەر-مينيستر اسقار ءماميننىڭ شىعۋىن تالاپ ەتكەن. نارازى ايەلدەرگە پرەمەر-مينيستردىڭ ءبىرىنشى ورىنباسارى گۇلشارا ءابدىحالىقوۆا، ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ جانە نۇر-سۇلتان اكىمى باقىت سۇلتانوۆ شىعىپ، سابىرعا شاقىرعان. ءبىراق بيلىكتەن باسپانا تالاپ ەتكەن انالار سول ماڭنان كەتپەي وتىرىپ العان. كەيىن ولارعا باقىتجان ساعىنتايەۆ شىعىپ، ولاردى ۇكىمەت ۇيىنە الىپ كىرىپ، شاعىمىن تىڭدادى..