- ايتىسكەر اقىن رينات زايتوۆ Youtube ارناسى ارقىلى تىكەلەي ەفيرگە شىقتى دەپ جازىدى Qamshy.kz اقپارات اگەنتتىگى.
سوڭعى كەزدەرى الدا كەلە جاتقان كەزەكتەن تىس پرەزيدەنت سايلاۋى تۋرالى ويىن اشىق ايتىپ جۇرگەن اقىن بۇل جولى دا تىكەلەي ەفيردە سايلاۋعا جانە كۇنى كەشە نۇر-سۇلتان قالاسىندا وتكەن حالىق قۇرىلتايىنا قاتىستى پىكىرىن ايتىپ، جەلى قولدانۋشىلارىنىڭ سۇراقتارىنا جاۋاپ بەردى.
"مەملەكەتىمىزدە وسىنداي جاعداي بولىپ جاتقاندا مەن سىرت قالا المايمىن"
ول الدىمەن، وزىنە "حالىقتى بۇلدىرمەي تىنىش ءجۇر" دەپ ايتىپ جۇرگەندەرگە جاۋاپ بەردى.
"بىرىنشىدەن، سىزدەرگە ۇناسىن، ۇناماسىن، مەملەكەتىمىزدە وسىنداي جاعداي بولىپ جاتقاندا مەن سىرت قالا المايمىن. ەكىنشىدەن، ەلدى شۋلاتىپ جۇرگەن مەن ەمەس شىعارمىن. وزدەرىڭىز بىلەسىزدەر بۇگىن عانا استانادا كوپ بالالى انالار «اشتىق جاريالايمىز» دەپ نارازىلىققا شىعىپ جاتىر"،- دەگەن زايتوۆ "تال بەسىكتەن جەر بەسىككە دەيىن پارا بەرەتىن، وتىرىكتەن قۇرالعان بيلىكتىڭ قازىرگى جۇيەسىن ءبىر قۇلاتىپ" الۋ ءۇشىن سايلاۋعا بارۋ كەرەكتىگىن دە ايتىپ ءوتتى.
قۇرىلتايعا قاتىستى
كەلەسى كەزەكتە اقىن ءوزىنىڭ 1 ماۋسىم كۇنى نۇر-سۇلتان قالاسىندا وتكەن حالىق قۇرىلتايىنا قالاي جانە قانداي ماقساتپەن بارعانى تۋرالى ايتتى.
"قۇرىلتاي دەپ ايتۋعا اۋزىم بارمايدى. قۇرمەتتى اعايىندار، مەن "اناۋ بيلىكتىڭ ادامى، مىناۋ بيلىكتىڭ ادامى" دەگەننەن اۋلاقپىن. اۋەلى ءبىر اللا كۋا. مەن وتىرىك ايتسام، قۇداي جازامدى بەرسىن، سىزدەر قاتەلەسسەڭىزدەر، اللا سىزدەردى كەشىرسىن. قالاي بولعانىن باستان-اياق ايتىپ بەرەيىن. قۇرىلتايعا شاقىرىلدىق. باردىم. ول جاققا بارعان سوڭ شۋ شىعۋىن قالاپ وتىرعان 10 شاقتى ادامدى بايقادىم. ولاردىڭ سونداي ويمەن بارعانى انىق. بىرەۋى كەلىپ ماعان تيسەدى، بىرەۋى باسقاسىنا بارىپ شۇيلىگەدى. سوسىن مەن بالتاش اعاعا: "مەن بىر-ەكى اۋىز ءسوز ايتسام بولا ما؟" دەدىم. ونىڭ ءوزىن سول جەردە تۇرعان جىگىتتەر قولقالادى. بالتاش اعا: "ەگەر سەن "قوسانوۆتى قولدايىق" دەپ ايتاتىن بولساڭ، سويلەمەيسىڭ" دەدى. ۇلكەن كىسى، قارسى شىعاتىن ەشقانداي قاقىم جوق، جارايدى" دەدىم. بۇرىلىپ كەتىپ بارا جاتقاندا، جاڭاعى قولقالاپ تۇرعان جىگىتتەر سونى كورىپ قالدى ما، "رينات سويلەسىن، رينات سويلەسىن" دەپ ايقايعا باستى. سوسىن 30 سەكۋندتاي سويلەدىم. ايتقانىم: "قازاقتىڭ جالعىز جاۋى بار. ول – "نۇر وتان". ءقازىر كىم نۇر وتانعا جاۋ، مەن سونىڭ دوسىمىن" دەدىم. مەن وسى سوزىمدە قالامىن. مەن بۇعان دەيىن دە وسىلاي ايتىپ كەلگەم. ال بارعانداعى ماقساتىم – ءوزىن وپپوزيسيا وكىلىمىن دەپ جۇرگەن ءھام وسى جۇيەگە قارسى ادامداردى وسى جۇيەگە قارسى جۇمىلدىرۋ"، – دەدى زايتوۆ.
توقايەۆقا قارسى داۋىس بەرۋ
كەلەسى كەزەكتە اقىن سايلاۋعا بايلانىستى ءتۇرلى ۇستانىمدا جۇرگەن حالىقتى بىرىگۋگە شاقىردى. اقىننىڭ ويىنشا، قازىرگى بيلىك جۇيەسى حالىقتىڭ جاقسى ءومىر سۇرۋىنە تۇبەگەيلى قارسى. سوندىقتان ول سايلاۋعا «بويكوت» دەپ جۇرگەندەردى جۇيەگە قارسى بىرىگۋگە شاقىردى. رينات زايتوۆ ول ءۇشىن سايلاۋعا بارىپ توقايەۆتىڭ كانديداتۋراسىنا قارسى ۇمىتكەرگە داۋىس بەرۋ كەرەك دەپ سانايدى.
تىكەلەي ەفيردىڭ تولىق نۇسقاسىن تومەندەگى ۆيدەودان كورە الاسىزدار.
ۆيدەو رينات زايتوۆتىڭ Youtube جەلىسىندەگى جەكە ارناسىنان الىندى.
پىكىر قالدىرۋ