شىمكەنتتە مۇگەدەك بالالار شەنەۋنىكتەردىڭ شەشىمى سالدارىنان ارنايى ورتا ءبىلىم الۋ مۇمكىندىگىنەن ايىرىلۋى مۇمكىن دەپ حابارلايدى Qamshy.kz اقپارات اگەنتتىگى كتك تەلەارناسىنا سىلتەمە جاساپ. "تۇركىستان وبلىستىق ءبىلىم باسقارماسىنداعىلار قۇلاعى ناشار ەستيتىن بالالارعا ارنالعان ينتەرنات تۇلەكتەرى اتىنان ارىز جازىپ، مۇگەدەكتەرگە ارنالماعان كادىمگى كوللەدجگە گرانت ءبولىپ جىبەرگەن" دەيدى اتا-انالار.

وسىعان نارازى ارنايى مەكتەپ-ينتەرناتتىڭ تۇلەكتەرى مەن اتا-انالار جينالىپ، ءبىلىم گرانتىن ينكليۋزيۆتى كابينەتتەرى بار كوللەدجگە ءبولۋىن تالاپ ەتتى. مىلقاۋ، قۇلاعى ەستىمەيتىن بۇل بالالار بيىل عانا لەڭگىردەگى ارنايى مەكتەپ-ينتەرناتتى ءتامامداپ، وقۋىن شىمكەنتتەگى №5 - كوللەدجدە جالعاستىرۋى ءتيىس ەدى. اتا-انالار ول ءۇشىن بىلتىردان بەرى كوللەدجدىڭ ءوزى مەن وبلىستىق ءبىلىم باسقارماسىنا بىرنەشە ارىز جازعان. ءبىراق مامىر ايىنىڭ اياعىندا گرانت تۇركىستانداعى مۇگەدەكتەرگە جاعداي جاسالماعان وزگە وقۋ ورنىنا بولىنگەنىن ءبىر-اق ءبىلىپتى.

"ماماندار جوق. 5 كوللەدجگە بالالار بارادى دەپ جازعان سەبەبىمىز، №5 كوللەدجدە سۋردولوگ، لوگوپەد  دەفەكتولوگ بار"، - دەدى شىمكەنت قالاسىنىڭ تۇرعىنى جانار سمانوۆا.

اتا-انالار وزدەرىنىڭ اتىنان ارىز جازىلىپ، گرانتتىڭ باسقا جاققا بولىنگەنىن بىلە سالا، تۇركىستان وبلىستىق ءبىلىم باسقارماسىنا بارعان. الايدا پەداگوگ-شەنەۋنىكتەر «گرانت ۇناماسا، بالالارىڭدى اقىلى تۇردە وقىتىڭدار» دەپ شىعارىپ سالدى" دەيدى. ال ءبولىم باسشىسى راحيا اسانوۆا تىگىنشىلىككە 21 گرانت بولىنگەنىن ايتادى. ءبىراق مۇگەدەك بالالار مەن اتا-انالارى وعان مۇرىن شۇيىرە قاراپ وتىرعان كورىنەدى.

"بازاسى وتە جاقسى. №5-كوللەدجدەن ەشقانداي كەمدىگى جوق. جۇمىس ءجۇرىپ جاتىر. "تۇركىستانعا كەلمەيمىز، ءشىرىپ كەتكەن" دەيدى. اكىمنەن باستاپ وسى جەردە تۇرىپ جاتىرمىز"، - دەپ مالىمدەدەمە جاسادى تۇركىستان وبلىستىق ءبىلىم باسقارماسىنىڭ ءبولىم باسشىسى راحيا اسانوۆا.

"اتا-انالاردىڭ ارىزىن ەسكەرمەۋىن وبلىس شەنەۋنىكتەرىنىڭ نەمقۇرايدىلىعى" دەگەن شىمكەنتتىك ءبىلىم باسقارماسىنداعىلار، ەندى ءبولىنىپ قويعان گرانتتى قايتا جاساقتاۋ كەرەكتىگىن ايتادى. اكىمدىك الدىنا جينالعانداردى «بالالار قىركۇيەكتە قالاعان وقۋ ورداسىنا بارادى» دەپ سەندىردى.

"بۇل ەندى كىشكەنە ۋاقىت الادى. دەگەنمەن، قىركۇيەكتە بالالاردىڭ بارلىعى ءوزىنىڭ تاڭداعان №5-كوللەدجىندە گرانت نەگىزىندە ءبىلىم الادى. جالپى باس-اياعى 50 بالانى گرانتپەن قامتۋعا جاعداي جاسايمىز"، - دەدى شىمكەنت قالالىق ءبىلىم باسقارماسى باسشىسىنىڭ مىندەتىن اتقارۋشى ايگۇل تەكەبايەۆا حانىم.

ەستۋ قابىلەتى ناشار، سويلەي المايتىن بالالار مەن اتا-انالار بۇل جولى دا شەنەۋنىكتەردىڭ ۋادەسىنە سەنىپ تارقاستى. ەندى ۋاعدا بويىنشا ولار تۇركىستاندا ەمەس، شىمكەنتتە وقۋى ءتيىس. اتا-انالار ءوتىنىشىن نازارعا الماي، "وزىمبىلەمدىككە" سالىنعان وبلىستىق ءبىلىم باسقارماسى دا جۇمىسسىز قالمايدى. ەندى ولاردىڭ الدىندا مۇگەدەكتەر باس تارتقان 21 گرانتتىڭ اقشاسىن بيۋدجەتكە كەرى قايتارۋ ماسەلەسى تۇر.