بۇگىن قازاقستان رەسپۋبليكاسىنىڭ مەملەكەتتىك رامىزدەر كۇنىنە وراي ماڭعىستاۋ وبلىسىندا ءبىر مەزەتتە 2 مىڭعا جۋىق ادام ءانۇراندى شىرقادى. 

 ەلدىكتىڭ نىشانى سانالاتىن مەملەكەتتىك رامىزدەردى ۇلىقتاۋعا ارنالعان پاتريوتتىق شارالار ايماقتاعى بارلىق قالا، اۋداندارىنىڭ ورتالىق الاڭدارىندا ءوتتى. اقتاۋداعى ەڭ بيىك تۋ تىگىلگەن رامىزدەر الاڭىنا 500 مەملەكەت قىزمەتىنىڭ ارداگەرلەرى، وبلىس جانە قالا اكىمدىگىنىڭ قىزمەتكەرلەرى، اۋماقتىق ۆەدومستۆولاردىڭ قىزمەتكرەلەرى جينالىپ، اشىق اسپان استىندا ءانۇراندى جاتقا ايتتى. ءانۇرانعا قۇرمەت كورسەتكەندەردىڭ قاتارىندا وبلىس اكىمى ەرالى توعجانوۆ پەن 1991 – 1993 جىلى ق ر جوعارى كەڭەسى ءتوراعاسىنىڭ ورىنباسارى بولعان، مەملەكەتتىك رامىزدەر تۋرالى زاڭنىڭ قابىلداۋىنا اتسالىسقان مەملەكەت جانە قوعام قايراتكەرى قايروللا ەرەجەپوۆ تا بار. الاڭدا ءانۇراندى شىرقاۋعا قالا تۇرعىندارى دا قوسىلدى. سونداي-اق بۇل كۇنى ءبىرقاتار جاس مەملەكەتتىك قىزمەتكەر انت قابىلدادى. ايتا كەتۋ كەرەك، ەلىمىزدىڭ مەملەكەتتىك تۋى مەن ءانۇرانى ازيا مەن بۇكىل الەمنىڭ ەڭ بيىك شىڭدارى – پامير تاۋىنىڭ لەنين شىڭىنا جانە ەۆەرەستە 8 مىڭ 800 مەترگە كوتەرىلىپ، شىرقالعان. 

1991 – 1993 جىلى ق ر جوعارى كەڭەسى ءتوراعاسىنىڭ ورىنباسارى قايروللا ەرەجەپوۆ سوزىندە «وسى مەملەكەتتىك رامىزدەردىڭ الدىن الا دايىندالىپ، سونىڭ قابىلدانعانىنا كۋا بولعان اداممىن. زاڭدى وسى كۇنى پرەزيدەنت نازاربايەۆ قول قويسا، سونىڭ ارتىندا جەتى ادامنىڭ قولدارى قويىلعان، سول جەتەۋدىڭ ءبىرى مەنىڭ قولىم بولاتىن ماڭعىستاۋلىقتاردىڭ بەرگەن مۇمكىندىگىنىڭ ارقاسىندا. قاي-قاي جەردە جۇرگەندە دە مەملەكەتتىك رامىزدەر، سەن ۇلكەن ءبىر مەملەكەتكە، تانىمال مەملەكەتكە قاتىناسىڭ بار ەكەنىن، سونىڭ مۇشەسى ەكەنىڭە ءارقاشاندا قۋانىپ، كەرەمەت كۇش بيلەيدى. بۇگىنگى مەرەكەمەن بۇكىل قازاقستان حالقىن قۇتتىقتايمىن» - دەدى.

جاس مەملەكەتتىك قىزمەتشى جىبەك سىرلىبايەۆا: -مەن بۇگىن قازاقستان رەسپۋبليكاسىنىڭ مەملەكەتتىك رامىزدەرى كۇنى وسى جەردە رامىزدەر الاڭىندا جينالىپ، بۇكىل مەملەكەتتىك قىزمەتكەرلەر قاتارىندا ءوزىم وسى ءانۇراندى ايتقانىما وتە قۋانىشتىمىن. سەبەبى بۇل شارانىڭ ارقاسىندا كوشەدە كەتىپ بارا جاتقان تۇرعىندار دا كەلىپ، كوردى، وسى ارقىلى ولاردىڭ جۇرەگىندە پاتريوتتىق سەزىمدلى وياتتىق دەپ ويلايمىن، - دەدى.

مەملەكەتتىك رامىزدەرىنىڭ 27-جىلدىعىنا ارنالعان شارالار كەشكە دەيىن جالعاسادى. كەشكى 19.30 كاسپيي جاعالاۋىنداعى امفيتەاتردا «ماڭعىستاۋ اتاۋىنىڭ تاريح بەتىندە پايدا بولعانىنا مىڭ جىل» مەرەكەسىن تويلاۋ باستالادى. ماڭعىستاۋ جۇلدىزدارى ءان-جىردان شاشۋ شاشادى.