سايلاۋ كۇنى قارساڭىندا قازاقستاننىڭ بارلىق اۋماعىندا قاۋىپسىزدىك شارالارى كۇشەيتىلمەك. بۇل تۋرالى  ىشكى ىستەر ءمينيسترى ەرلان تۇرعىمبايەۆ حابارلادى دەپ جازادى Qamshy.kz اقپارات اگەنتتىگى.

مينيستر ءقازىر بۇكىل ەلدىڭ اۋماعىندا "قۇقىق ءتارتىبى" اتتى وپەراسيا جۇرگىزىلىپ جاتقانىن ايتتى. 

"نۇر-سۇلتاندا عانا ەمەس، بۇكىل ەل بويىنشا قاۋىپسىزدىك شاراسى رەتىندە 6 ماۋسىمعا دەيىن "قۇقىقتىق ءتارتىپ" وپەراسياسى جۇرگىزىلەدى. سوسىن 7 ماۋسىمدا بۇكىل پوليسيا كۇشەيتىلگەن جۇمىس تارتىبىنە كوشەدى، ويتكەنى ەلدە سايلاۋ وتەدى"، – دەدى ول.

ەستەرىڭىزگە سالا كەتسەك، 8 ماۋسىم تىنىشتىق كۇنى، سوندىقتان ۇگىت-ناسيحاتقا تىيىم سالىنعان. 

"بۇل بىرەۋدەن قورعانۋ ءۇشىن ەمەس، قوعامدىق قاۋىپسىزدىكتى قامتاماسىز ەتۋ ءۇشىن قاجەت. 8ء-ى تىنىشتىق كۇنى، ۇگىت-ناسيحات جۇمىستارىنا تىيىم سالىنادى، 9-ى سايلاۋ، بارلىق جەرلەردە پوليسيا پاترۋلدەرى جۇمىس ىستەيدى. 21 مىڭنان استام پوليسەي جۇمىسقا شىعادى"، – دەپ اتاپ ءوتتى تۇرعىمبايەۆ.

"9 ماۋسىمدا سايلاۋ، ول وتە ەرتە باستالادى. قاۋىپسىزدىكتى قامتاماسىز ەتۋ ءۇشىن ءبىزدىڭ پاترۋلدەردىڭ بارلىعى جۇمىس ىستەيدى. بۇل سايلاۋ كەزىندە وتكىزىلەتىن قالىپتى شارالار"، - دەپ سەندىردى مينيستر.