AMD كومپانياسى جانە Samsung Electronics AMD Radeon بازاسىنا نەگىزدەلگەن وتە قۋاتتى، جوعارى ءونىمدى گرافيكالىق تەحنولوگيالار سالاسىنداعى كوپ جىلدىق ستراتەگيالىق سەرىكتەستىك ورناتاتىنى تۋرالى مالىمدەدى دەپ حابارلايدى Qamshy.kz اقپارات اگەنتتىگى.
Samsung سەرىكتەستىك ورناتۋ اياسىندا AMD گرافيكالىق IP-بلوكتارىنا ليسەنزيا بەرەدى جانە وزىق تەحنولوگيالاردى قۇرۋعا باعىتتالادى. ءموبيلدى قۇرىلعىلاردىڭ مۇمكىندىكتەرىن ارتتىرۋ ءۇشىن گرافيكا اۋماعىنداعى ماسەلەلەر رەتتەلەدى.
«AMD كومپانياسىمەن سەرىكتەستىك ورناتۋ نارىقتا يننوۆاسيالىق گرافيكالىق ونىمدەردى ۇسىنۋعا جانە بولاشاقتىڭ موبيلدىك قۇرىلعىلارىن دامىتۋعا مۇمكىندىك بەرەدى»، - دەدى Samsung Electronics كومپانياسىنىڭ System LSI باعىتىنىڭ پرەزيدەنتى ينيۋپ كانگ.
«جەكە كومپيۋتەرلەرگە، ويىن قۇرىلعىلارىنا، Radeon گرافيكالىق تەحنولوگياسىن ەنگىزۋ ايتارلىقتاي دامىپ كەلەدى. جانە ءبىز Samsung سىندى ءىرى كومپانيامەن سەرىكتەستىك ورناتقانىمىزعا قۋانىشتىمىن. بۇل ءبىز ءۇشىن ءموبيلدى قۇرىلعىلار نارىعىندا گرافيكالىق يننوۆاسيالاردى جاساپ شىعۋعا ۇلكەن مۇمكىندىك اشىپ وتىر»، - دەدى AMD كومپانياسىنىڭ پرەزيدەنتى لايزا سۋ.
AMD كومپانياسى مەن Samsung اراسىنداعى سەرىكتەستىك شارتى ءموبيلدى قۇرىلعىلار ءۇشىن RDNA جوعارى ءونىمدى گرافيكالىق ارحيتەكتۋراعا نەگىزدەلگەن ليسەنزيانى الۋعا جول اشادى.
پىكىر قالدىرۋ