ماڭعىستاۋلىق بەلسەندى جاستار جازعى لاگەردە باس قوستى. شارانىڭ باستى ماقساتى - جاستار جىلىنىڭ اياسىندا مىڭ جىلدىق تاريحى بار ماڭعىستاۋ ولكەسىنىڭ تاعىلىمىن كەيىنگى ۇرپاققا دارىپتەۋ، تاريحي سانا قالىپتاستىرۋ، ءاربىر جاستى وتانسۇيگىشتىك پەن جاۋاپكەرشىلىك سەزىمگە تاربيەلەۋ، ءتول مادەنيەتىمىزدى وسكەلەڭ ۇرپاقتىڭ بويىنا ءسىڭىرۋ. «كوگەز» ەتنو اۋىلىندا ۇيىمداستىرىلعان لاگەرگە جاستار ۇيىمدارىنىڭ وكىلدەرى، ەرىكتى جاستار، مۇمكىندىگى شەكتەۋلى جاستار،   دارىندى مەكتەپ وقۋشىلارى، جاس كاسىپكەرلەر مەن ۆاينەرلەر قاتىستى. جالىنداعان ءوڭىر جاستارىنا قولداۋ كورسەتىپ، دەمەۋ بولۋ ءۇشىن وبلىس اكىمى ەرالى توعجانوۆ اشىق اسپان، تابيعات اياسىنداعى شاراعا قاتىستى. بەيرەسمي فورماتتاعى كەزدەسۋدە جاستار ءوڭىر باسشىسىمەن ەركىن تاقىرىپتا سۇقباتتاسىپ، كوكەيتەستى ساۋالدارىن قويدى. سونىمەن قاتار، تۋريزم جانە اۋىل شارۋاشىلىق سالالارىنداعى ماڭىزدى يدەيالارىن تىڭداپ، جاستار جۇزەگە اسىرعان تابىستى جوبالارمەن تانىستى. ەرالى توعجانوۆ: «ماڭعىستاۋ اتاۋىنىڭ مىڭجىلدىعى كۇنى كەشە وبلىس كولەمىندە باستاۋ الدى. بۇل -  رۋحقا تاعزىم، اتا-بابا اماناتىن ورىنداۋ، جەتكىنشەك ۇرپاققا ونەگە، تاريح ءۇشىن تۇعىرلى بەلەس دەپ ەسەپتەيمىن! سىزدەر دە  وسى باستامانى قولداپ، ءارى قاراي جالعاستىرادى دەپ سەنەمىن. ءبارىمىز بىرگە اتسالىسىپ، اتا-بابالارىمىزدىڭ الدىنداعى پارىزدى ابىرويمەن ورىنداۋىمىز قاجەت» - دەدى. ايماق باسشىسى ەرەكشە اتاپ وتكەن تاعى ءبىر ءجايت - جاستاردىڭ اراسىنداعى ەرىكتىلەر توبى. «مۇقتاج جاندارعا كومەك كورسەتىپ، ولارعا قۋانىش سىيلاۋ – ەڭ ۇلكەن باقىت. جاقىندا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ قوستانايدا وتكەن ەرىكتىلەر فورۋمىندا ماڭعىستاۋلىق ەرىكتى جاستاردىڭ قىزمەتىن جوعارى باعالاپ، ەرەكشە اتاپ وتكەن بولاتىن. وسى ورايدا مەن دە وبلىستىق جاستار رەسۋرستىق ورتالىعى جانىنداعى «ەرىكتىلەر كورپۋسىنا» ابىرويلى قىزمەتتەرى ءۇشىن العىس ايتامىن.  جالپى، مەنى قۋانتاتىنى ەرىكتى جاستاردىڭ قاتارىنىڭ كوبەيۋى. جۋىردا بەينەۋ اۋدانىندا 10 جىل بۇرىن مەكتەپ بىتىرگەن تۇلەكتەر جينالىپ، جاعدايى تومەن وتباسىعا ءۇي الىپ بەرگەن. بۇل ۇلكەن باستاما. رامازان ايىندا مۇنداي ساۋاپتى ءىستى جاساعان جاستارىمىز كوپكە ۇلگى» ەكەنىن ەرەكشە اتاپ ءوتتى. لاگەردە ۇلتتىق ويىندار (اسىق اتۋ، ارقان تارتۋ، جامبى اتۋ، كوكپار، توعىزقۇمالاق، ۇرشىق ءيىرۋ، اۋدارىسپاق، تەڭگە ءىلۋ) ويناتىلىپ، شەرقالا - ايراقتى تاۋى، قىزىل قالا تاريحي جەرىنە جاستار ساياحاتى جانە جاستاردىڭ ەكولوگيالىق اكسياسى ۇيىمداستىرىلدى. اعاش ءۇي ماڭىنا دارىندى سۋرەتشى بەكەجان مەرەيدىڭ كارتينالارى قويىلىپ، «ونەر» كوللەدجى سۋرەتشىلەرىنىڭ پلەنەرى ۇسىنىلدى.

جاستار ءار توپقا ءبولىنىپ، تۋريزم جانە كاسىپكەرلىك تاقىرىبىندا سەمينار ترەنينگكە قاتىسىپ، جوبالارمەن جۇمىس جاسادى. كەزدەسۋ سوڭىندا ءوڭىر باسشىسى جاستارمەن بىرگە «كەشكى الاۋعا» قاتىسىپ، اقىل-كەڭەسىمەن ءبولىستى.