سايلاۋعا قاتىستى بۇگىن ساعات 11:00-گە دەيىن 14 بۇزۋشىلىق تىركەلدى دەپ حابارلايدى Qamshy.kz اقپارات اگەنتتىگى.
ولار نەگىزىنەن بولماشى سيپاتتاعى تەحنيكالىق جانە ۇيىمداستىرۋشىلىق جاعىنان كەتكەن كەمشىلىكتەر. بۇل تۋرالى الەۋمەتتىك جەلىدەگى تىكەلەي ەفير كەزىندە "امانات" ازاماتتىق پلاتفورماسىنىڭ وكىلى مۇرات ابەنوۆ ءمالىم ەتتى.
بۇگىن ساعات 12:00-دەگى جاعداي بويىنشا قازاقستاننىڭ بارلىق اۋماعىنداعى سايلاۋ ۋچاسكەلەرى "امانات" ازاماتتىق پلاتفورماسىنىڭ تاۋەسىز بايقاۋشىلارىمەن قامتىلدى. قازىرگى ۋاقىتتا 10 مىڭعا جۋىق بايقاۋشى مەن 400-دەن استام ءموبيلدى كاپيتاندار بارلىق وبلىستاردا بايقاۋ شارالارىنا قاتىسۋدا. "امانات" تاراپىنان بايقاۋ شارالارى ۋاقتىلى باستالدى.
"جالپى، ساعات 11:00-گە دەيىن 14 بۇزۋشىلىق تىركەلدى. سايكەسىنشە، ولار بويىنشا اكتىلەر قۇرىلدى، بۇلار كۇردەلى ەمەس، بولماشى سيپاتتاعى بۇزۋشىلىقتار. ياعني، ولار تەحنيكالىق-ۇيىمداستىرۋشىلىق سيپاتتاعى كەمشىلىكتەر. سونىمەن قاتار 50-گە تارتا اۋىزشا ەسكەرتۋ جاسالدى جانە ولار بويىنشا سايلاۋ كوميسسيالارى شۇعىل شەشىم قابىلدادى"، - دەدى "امانات" ازاماتتىق پلاتفورماسىنىڭ وكىلى مۇرات ابەنوۆ.
وسى ورايدا ول تۇعىرماناما تاراپىنان بايقاۋشىلىق قىزمەتتى اتقارىپ جۇرگەن ارىپتەستەرىن قازاقستاننىڭ زاڭدارى تالاپتارىن قاتاڭ ۇستانۋعا شاقىردى. م. ابەنوۆ "امانات" سايلاۋدى بارىنشا اشىق وتكىزۋگە ۇلەس قوساتىنىن ايتا كەلە، "ءبىزدىڭ بايقاۋشىلار بەيتاراپ ۇستانىمدا بولادى. ءبىز ارنايى كودەكس ازىرلەدىك. وندا ءبىز ماقساتىمىزدى ايقىنداپ، بۇزۋشىلىقتار انىقتالعان كەزدە قانداي ءىس-قيمىلدار جاساۋ كەرەكتىگىن كورسەتتىك"، - دەدى.
پىكىر قالدىرۋ