مەملەكەت باسشىسىنىڭ سايلاۋالدى باعدارلاماسى مەن ستراتەگيالىق مىندەتتەردى جۇزەگە اسىرۋ ارقىلى الەۋمەتتىك ماسەلەلەردى شەشۋگە مۇمكىندىك جاسالادى دەپ حابارلايدى Qamshy.kz اقپارات اگەنتتىگى قازاقپارات سايتىنا سىلتەمە بەرە وتىرىپ.

«9 ماۋسىم - تاريحي كۇن، ق ر پرەزيدەنتىن كەزەكتەن تىس سايلاۋ ءوتتى. ق ر تۇڭعىش پرەزيدەنتى - ەلباسى نۇرسۇلتان نازاربايەۆتىڭ توراعالىعىمەن وتكەن Nur Otan پارتياسى سەزىندە ۇسىنىلعان ۇمىتكەر قاسىم-جومارت كەمەل ۇلى جەڭىسكە جەتتى. حالىقتىڭ قولداۋى ارقاسىندا ەلباسىنىڭ ستراتەگيالىق باعدارىنىڭ ساباقتاستىعى قامتاماسىز ەتىلەدى. مەملەكەت باسشىسىنىڭ سايلاۋالدى باعدارلاماسىن تولىعىمەن جۇزەگە اسىرۋ - ءبىزدىڭ ورتاق مىندەتىمىز. ونىڭ نەگىزىندە ەكونوميكا مەن ينفراقۇرىلىمنىڭ تۇراقتى دامۋى، قولجەتىمدى باسپانامەن قامتاماسىز ەتۋ، سونىمەن بىرگە، ءبىلىم بەرۋ، دەنساۋلىق ساقتاۋدى جاقسارتۋ ارقىلى حالىقتىڭ تابىسى مەن ءومىر ساپاسىن ارتتىرۋ بار»، - دەپ اتاپ ءوتتى پرەمەر-مينيستر.

ونىڭ ايتۋىنشا، جاڭا جۇمىس ورىندارىن اشۋ «ۇكىمەتتىڭ  باستى مىندەتى» بولماق.

«جاڭا جۇمىس ورىندارىن اشۋ جاڭا وندىرىستەردىڭ اشىلۋىنا تىكەلەي بايلانىستى. ونى ينۆەستيسياسىز جۇزەگە اسىرۋ مۇمكىن ەمەس. بارلىق اكىمدەر مەن مەملەكەتتىك ورگانداردىڭ باسشىلارى ينۆەستيسيالاردى تارتۋعا، شاعىن جانە ورتا بيزنەستىڭ دامۋىنا بارىنشا كوڭىل ءبولۋى قاجەت. بۇل جۇمىستى توقتاۋسىز جۇرگىزۋ قاجەت. جۇمىس بولسا، حالىقتىڭ تۇرمىسى جاقسارادى. دەمەك، نارازىلىق تا بولمايدى دەگەن ءسوز. مەملەكەت باسشىسىنىڭ سايلاۋالدى باعدارلاماسى مەن ستراتەگيالىق مىندەتتى ءتيىمدى جۇزەگە اسىرۋ ارقىلى الەۋمەتتىك ماسەلەلەردى شەشۋگە مۇمكىندىك جاسالادى»، - دەدى اسقار مامين.

ۇسىنعان: بەك بايتاس