سايلاۋ كەزىندە ءامىرجان قوسانوۆتى قولداپ، حالىققا ۇگىت-ناسيحات جۇرگىزگەن دوس كوشىم سايلاۋدان كەيىنگى العاشقى پىكىرىن ءبىلدىردى دەپ جازادى Qamshy.kz اقپارات اگەنتتىگى. 

دوس كوشىم سايلاۋدان كەيىن ءبىرشاما ۋاقىت ەلدەگى جاعدايلار جايىندا ءتىل قاتپاعان. بارلىق زاڭ بۇزۋشىلىق پەن ادىلەتسىزدىكتى تالقىلاپ ەل الدىنا شىققان دوسمۇحاممەد مىرزا:

«ارينە، ءقازىر كەش شىعار. ءبىز بارلىق ماتەريالدى جيناپ شىققان سوڭ عانا تولىق مالىمەت بەرۋگە بولادى. قازىرگى تاڭدا ءبىزدىڭ كورىپ وتىرعانىمىز ءبىر عانا نارسە، ول سايلاۋدىڭ ادىلەتسىز وتكەنى.  سايلاۋ اشىق، دەموكراتيالىق تۇردە وتكەن جوق. باقىلاۋشىلاردىڭ قۇقىعى بۇزىلدى. ولارعا قىسىم كورسەتىلدى. 90 پايىز باقىلاۋشىلاردى ساعات 21:00 بولماي جاتىپ ۋچاسكەدەن قۋا باستادى. ءبىزدىڭ ورتالىق شتاب حاتتامالاردىڭ تەك 10%-ىن عانا الدى. ءبىز نەگىزىندە 70-80% باقىلاۋشىلاردان جاۋاپ الامىز دەپ ويلاعانبىز. بيلىكتەگىلەر ءبىزدىڭ حاتتامانى العانىمىزدى قالاماعان سەكىلدى. باقىلاۋشىلاردىڭ قولىندا حاتتاما بولماعانىمەن، قۇدايعا شۇكىر، ءقازىر بارلىعىندا گادجەت بار. سول ارقىلى ءبىز سايلاۋدىڭ ادىلەتسىز ەكەنىن دالەلدەي الامىز. ءبىز ءقازىر 10000-نان اسا زاڭ بۇزۋشىلىقتى تىركەپ وتىرمىز. مەنىڭ بىلەتىنىم، حالىقتىڭ بىلەتىنى سايلاۋ ادىلەتسىز ءوتتى.»،- دەدى.

"سايلاۋ ءادىل، اشىق تۇردە وتەدى" دەگەن پرەزيدەنت قاسىم-جومارت توقايەۆ جايلى:

«قاسىم-جومارت كەمەل ۇلى دا نۇرسۇلتان نازاربايەۆتىڭ توبىندا بولعان ادام، ول توپ ىشىندە بۇرىننان بار. ول دا وسى اۆتوريتارلىق جۇيەنىڭ قۇرامىندا بولعان. ابىرويلى جۇمىسى ءۇشىن حالىق توقايەۆپەن بىرگە ساياسي رەفورما كەلەتىن شىعار دەپ ويلادى. ساياسي رەفورما تەك سايلاۋ ءادىل وتكەن كەزدە عانا بولادى.»،- دەدى.

ءسوزىن تولىقتىرا كەلە:

«مەنىڭشە، حالىقارالىق باقىلاۋشىلار وتە از. ولار توپپەن جۇمىس جاساپ جاتىر. ءارقايسىسى 2-3 ۋچاسكەنى عانا تەكسەرە الدى، ال قالعان جەرلەردە بارلىعى ويىنا كەلگەنىن ىستەگەن شىعار»،- دەدى دوس كوشىم.