قاسىم-جومارت توقايەۆ قازاقستان پرەزيدەنتىن ۇلىقتاۋ راسىمىندەگى رەسمي مالىمدەمەسىندە حالىقتى تولعاندىرىپ وتىرعان مالەسەلەردى ايتتى دەپ حابارلايدى Qamshy.kz اقپارات اگەنتتىگى.
–حالىقتى تولعاندىرىپ وتىرعان باستى ماسەلە - تابىس كولەمىنىڭ ازايۋى. حالىقارالىق قارجى نارىقتارىنىڭ تۇراقسىزدىعى، تەڭگەنىڭ ديەۆالۆاسياسى حالىقتىڭ تابىسىنا كەرى اسەر ەتتى. ميلليوننان استام ازاماتىمىز بانكتەن نەسيە الۋعا ءماجبۇر بولدى. تابىسى جوعارى جانە تومەن ازاماتتاردىڭ اراسىنداعى الشاقتىق - قوعامدى مازالايتىن تاعى ءبىر وزەكتى ماسەلە. ارينە، مۇنداي قۇبىلىستار بۇكىل الەمدە بار. دەگەنمەن، توقمەيىلسىپ وتىرا بەرۋگە بولمايدى. سوندىقتان، ءدال وسى وتكىر الەۋمەتتىك، ەكونوميكالىق جانە ساياسي ماسەلەنى شەشۋ، ورتاق مەرزىمدى كەشەندى شارالار قابىلداۋ قاجەت. قورشاعان ورتانىڭ قازىرگى مۇشكىل ءحالى - كوپشىلىكتىڭ كوكەيىندەگى ماسەلە. سوندىقتان ەلىمىزگە ءبىرىڭعاي ەكولوگيالىق ساياسات قاجەت، - دەدى مەملەكەت باسشىسى.
سونىمەن قاتار، قاسىم-جومارت توقايەۆ ەلدەگى تازا اۋىز سۋ ماسەلەسىن ايتىپ ءوتتى.
–قورشاعان ورتانى قورعاۋ جۇيەسىنە سەرپىن بەرەتىن جاڭا ەكولوگيالىق كودەكس قابىلداۋ كەرەك. كەلەسى وزەكتى ماسەلە - حالىقتى سۋمەن قامتاماسىز ەتۋ. تازا اۋىز سۋ ءاربىر ۇيدە، ءاربىر وتباسىدا بولۋى مىندەت. تاعى ءبىر حالىقتى مازالايتىن ماڭىزدى ماسەلە - بۇل جولداردىڭ ساپاسى. سول سەبەپتى اۆتوجولداردىڭ جاعدايىن جاقسارتۋ - ءبىزدىڭ نەگىزگى ماقساتتارىمىزدىڭ ءبىرى، - دەدى توقايەۆ.
پىكىر قالدىرۋ