"قۇرمەتتى مۇحامەدجان تازابەك، وسى ۋاقىتقا دەيىنگى جازبالارىڭىزعا، قوعامداعى بەلسەندىلىگىڭىزگە قاراپ، سىزگە بىرنەشە سۇراق جولداعىم كەلەدى.
ادامزاتقا ورتاق قۇندىلىقتاردى بويىنا سىڭىرگەن ادام، قۇدايىنا سەنگەن مۇسىلمان اقتى اق، قارانى قارا دەپ ايتادى.
ءبىرىنشى سۇراق: ادىلەتتى پاتشا ومارلاردان (ر.ا) ۇلگى الىپ، ءدىن جولىن ناسيحاتتاۋشى، اقيقاتتى سەرىك ەتكەن اقىن رەتىندە ادىلەتسىز وتكەن سايلاۋ جايلى نەلىكتەن جاق اشپايسىز؟ ونىڭ ادىلەتتى وتۋىنە ات سالىسىپ، داۋىستى ۇرلاپ، قاسىم-جومارت توقايەۆقا توپىرلاتىپ بيۋللەتەندەردى سالۋ-كۇنا ەكەنىن نەگە ەسكەرتپەيسىز؟
ەكىنشى سۇراق: رينات زايىت ايتىسكەر بولعاندىقتان ءبارىمىز بوستاندىق سۇرادىق. وسى ۋاقىتقا دەيىن ەلگە تانىلماسا دا، ادىلدىكتى ىزدەگەن، جەرىمدى قورعايمىن دەپ تەمىر تورعا توعىتىلعان ءار قازاق ءبىزدىڭ باۋىرىمىز ەمەس پە؟!
سولارعا نەگە اراشا تۇسە المايمىز؟ بۇل تىرلىك ادام بالاسىن الالاۋ ەمەس پە؟
ءۇشىنشى سۇراق: حالىقتىڭ پىكىرىن قاجەت ەتپەيتىن، قۇقىعىن شەكتەيتىن ەلدە كوشەگە جۇرت ءبىر ادامنىڭ سوزىمەن الاڭعا شىعادى دەپ ويلايسىز با؟
ەشكىمگە اقىسىن جەگىزبەگەن، جەرىن جالعا بەرگىزبەگەن الاش جۇرتى ءوز ەركىمەن باس كوتەرە المايدى ما؟ الدە، ايتقانعا كونە بەرەتىن، سۇققانعا بۇعا بەرەتىن قاراشا جۇرت قۇل بولعانى ما؟
ءتورتىنشى سۇراق: شىنىمەن بۇلىك تۋۋدى قالاماساڭىزدار.الەۋمەتتىك جەلى دە عانا بەلسەندى بولماي، ءدىن ماماندارى، ءدىندى ناسيحاتتاۋشى ادامدار، كەشەگى بيلەرشە، ارمەنياداعى ءدىن وكىلدەرىندەي حالىق پەن بيلىكتىڭ اراسىن جاقىنداتۋعا، ەلدىڭ اراسىنان، الاڭنان نەگە تابىلمايسىزدار؟ بەيبىت شەرۋگە رۇقسات الىپ، وزدەرىڭىزدى وسىرگەن جۇرتتىڭ جان-ايقايىن بيلىككە جەتكىزبەيسىزدەر مە؟ الدە، جولدىڭ جابىلۋى، جوسپاردىڭ بۇزىلۋى ۋايىم با؟ ادىلدىك دەپ شىرىلداعان ءوز حالقىڭىزدى، قارياڭىزدى، ۇل-قىزىڭىزدى قورعاۋ ءقاۋىپتى بولسا، ءبىز سوندا قانداي دامىعان مەملەكەتتە ءومىر ءسۇرىپ جاتىرمىز؟
بيلىكتىڭ دە قاتەسى بار شىعار دەپ ۇستىنەن سۇيكەي سالىپ، قاراپايىم حالىققا عانا اقىلشى بولۋ جۇمىستارىڭىزعا اينالىپ بارا جاتقان جوق پا؟وزدەرىڭىزدەي ۇلكەندەرگە ءبىر جاعىنان ءابليازوۆ راحات بولدى.ەل شىرىلداپ شىقسا، ءبارىن سىرتتاعىعا ەرگەن بۇلىكشى قىلا سالاسىزدار.ءبىراق، ۇمىتپاڭىزدار! جاڭاوزەندە دە، جەر ماسەلەسىندە دە حالىقتى الىپ شىققان نامىسى مەن رۋحى.
ءسىز دە، ءبىز دە ەلىمىزدى دامىعان مەملەكەتتەردىڭ قاتارىنان كورگىمىز كەلەدى عوي. وركەنيەتتى ەلدەردە ادامداردىڭ بىر-بىرىمەن پىكىر الماسۋى، ءوز ويلارىن ەركىن ايتا ءبىلۋى ءقاۋىپتى جاعداي ەمەس.ول ءۇشىن كەك تە قۋمايدى ەكەن.
ويلاعاندارىڭىز ەلدىڭ ەرتەڭى بولسا، قۇدايشىلىعىن ايتىپ، بۇگىنگى جۇيەنىڭ، قوعامنىڭ شىنايى بەينەسىنە تىك قاراپ، ءاردايىم ادىلدىك جاعىندا بولىڭىزدار!
قايرات نۇرقانات 12.06.2019 جىل"،- دەپ جازىپتى نۇرقانات قايرات ءوزىنىڭ فەيسبۋكتەگى جازباسىندا.
پىكىر قالدىرۋ