ايتىسكەر اقىن رينات زايتوۆ Instagram پاراقشاسىنا ۆيدەو جۇكتەپ، سەمەيدە ەكەنىن ايتتى دەپ جازادى Qamshy.kz اقپارات اگەنتتىگى. 

"بىرەۋلەر "رينات ميتينگىگە شاقىرىپ ءجۇر" دەپ شۋلاتىپ ءجۇر دەيدى. قۇرمەتتى اعايىن، مەن باسىندا دا ايتقانمىن، ءقازىر دە ايتامىن، مەن ەشقاشان ءبىر وزگەرىستى ادامداردىڭ قان توگىسىمەن جاسامايمىن. سوندىقتان ءبارىڭىز امان-ساۋ بولىڭىزدار. سىزدەرگە ايتار زور العىسىم بار. قۇداي قالاسا، بىر-ەكى كۇن دەمالىپ، وز-وزىمە كەلىپ الايىنشى. بىرەۋلەردىڭ ىرىڭ-جىرىڭ بوس اڭگىمەلەرىنە ەرە بەرمەڭىزدەرشى"،- دەدى زايتوۆ ينستاگرامداعى ۆيدەوسىندا. 

ەستەرىڭىزگە سالا كەتەيىك، ايتىسكەر اقىن رينات زايتوۆ 10 ماۋسىمدا كەزەكتەن تىس پرەزيدەنت سايلاۋىنىڭ ناتيجەسىمەن كەلىسپەيتىنىن ايتىپ، ءبىر توپ باقىلاۋشىلارمەن بىرگە الماتىداعى "الاتاۋ" ءداستۇرلى ونەر تەاترىنىڭ الدىنا جينالعان. ول حالىقتان سايلاۋدا "ءامىرجان قوسانوۆتى قولدايىق" دەپ ايتقانى ءۇشىن كەشىرىم سۇراپ، الداعى ۋاقىتتا پارتيا قۇرعىسى كەلەتىنىن ايتا باستاعاندا پوليسيا مەن ارنايى جاساق جينالعانداردى جاپپاي ۇستادى. ۇستالعانداردىڭ اراسىندا زايتوۆتا بولدى.

ءبىراق ءبىرشاما ۋاقىتتان كەيىن اقىن Youtube جەلىسىندەگى ارناسى ارقىلى ءوزىن پوليسيا بوساتقانىن ايتىپ ۆيدەو تاراتتى.

500-گە جۋىق ادام زايتوۆتى "ءوز كوزىمىزبەن كورمەسەك، بوساتىلعانىنا سەنبەيمىز" دەپ الماتى پوليسيا دەپارتامەنتىنىڭ الدىنا جينالدى. رينات زايتوۆ جينالعانداردىڭ اراسىنا ءوزى كەلىپ، تارقاۋعا شاقىردى.

♦وقي وتىرىڭىزدار: ءجۇرسىن ەرمان: ريناتتىڭ قايدا ەكەنىن ءوزىم دە بىلمەيمىن