مەديسينالىق كومەك كورسەتۋدىڭ قانداي تاسىلدەرى قاجەت ەكەنىن دەنساۋلىق ساقتاۋ ءمينيسترى ۇكىمەت وتىرىسىندا ايتتى، دەپ حابارلايدى Qamshy.kz اقپارات اگەنتتىگى قازاقپارات سىلتەمە بەرە وتىرىپ.

«ەلباسىنىڭ تاپسىرماسى بويىنشا تەگىن مەديسينالىق كومەكتىڭ كەپىلدىك بەرىلگەن كولەمىنىڭ (تەگىن مەديسينالىق كومەك) جاڭا ۇلگىسى جانە مىندەتتى الەۋمەتتىك مەديسينالىق ساقتاندىرۋ (مەديسينالىق ساقتاندىرۋ جۇيەسى) جۇيەسىندەگى مەديسينالىق كومەك پاكەتى ازىرلەندى. ولار 2020 جىلدىڭ قاڭتارىنان باستاپ قولدانىسقا ەنەدى. بۇل جۇمىس بۇۇ تۇراقتى دامۋ ماقساتتارىنا سايكەس جۇرگىزىلدى. جالپى تانىلعان الەمدىك دەنساۋلىق ساقتاۋ ستاندارتتارى دەنساۋلىققا بايلانىستى قارجىلىق تاۋەكەلدەردەن قورعاۋدى، سونداي-اق سوزىلمالى ينفەكسيالىق ەمەس اۋرۋلاردى باسقارۋدى قامتاماسىز ەتەتىن مەديسينالىق-سانيتارلىق قىزمەتتەرمەن جاپپاي قامتۋدى ايقىندادى»، - دەدى ەلجان ءبىرتانوۆ ۇكىمەت وتىرىسىندا.

ءمينيستردىڭ ايتۋىنشا، بيۋدجەتتىك شىعىنداردىڭ جىل سايىن ۇلعايۋىنا قاراماستان، تەگىن مەديسينالىق كومەكتى قارجىلاندىرۋدىڭ  قازىرگى دەڭگەيى حالىقتىڭ مەديسينالىق كومەككە ءوسىپ كەلە جاتقان سۇرانىسىن قامتاماسىز ەتە الماي جاتىر. مينيسترلىكتىڭ باعالاۋىنشا تەگىن مەديسينالىق كومەكتى قارجىلىق قامتاماسىز ەتۋ تاپشىلىعى تەك 2017 جىلى 363 ملرد تەڭگەنى قۇراعان.

«سونىڭ سالدارىنان بۇل باعىتتاعى شىعىن 2017 جىلى دەنساۋلىق ساقتاۋدىڭ جالپى شىعىستارىنىڭ 42 پايىزىنا (678 ملرد تگ) جەتتى. بۇل دۇنيەجۇزىلىك دەنساۋلىق ساقتاۋ ۇيىمى ۇسىنعان شەكتى دەڭگەيدەن ەكى ەسە جوعارى»، - دەدى ەلجان ءبىرتانوۆ.

مينيستر اتاپ وتكەندەي، جوعارىدا ايتىلعانداردى ەسكەرە وتىرىپ، حالىقتى مەديسينالىق قامتاماسىز ەتۋدىڭ ءۇش دەڭگەيلى جۇيەسى ازىرلەنگەن. ءبىرىنشى دەڭگەي - ق ر بارلىق ازاماتتارىنا، ورالماندار مەن تۇراقتى تۇراتىن شەتەلدىكتەرگە مەملەكەتتىك بيۋدجەت ەسەبىنەن تەگىن مەديسينالىق كومەك بەرۋدى قامتاماسىز ەتەدى. بۇل پاكەت تەگىن مەديسينالىق كومەكتىڭ مىناداي تۇرلەرىن قامتيدى: تىركەلگەن جەرى بويىنشا مەديسينالىق-سانيتارلىق العاشقى كومەك، جەدەل كومەك، سانيتارلىق اۆياسيا جانە شۇعىل ستاسيونارلىق كومەك،  دارى-دارمەكپەن قامتاماسىز ەتۋدى قوسا العاندا، الەۋمەتتىك ءمانى بار اۋرۋلار مەن نەگىزگى سوزىلمالى اۋرۋلار كەزىندە مەديسينالىق كومەكتىڭ تولىق سپەكترى. ەكىنشى دەڭگەي - ساقتاندىرىلعان حالىق ءۇشىن مەديسينالىق ساقتاندىرۋ جۇيەسى پاكەتى - ول تەگىن مەديسينالىق كومەكتەن تىس قىزمەتتەردى قامتاماسىز ەتىپ، اۋرۋلاردىڭ كەڭ سپەكترى بويىنشا كونسۋلتاسيالىق، دياگنوستيكالىق، جوسپارلى ستاسيونارلىق كومەك جانە تەگىن دارى-دارمەكپەن قامتاماسىز ەتۋ، ستاسيوناردى الماستىراتىن كومەك، وڭالتۋ جانە قالپىنا كەلتىرۋ ەمىن قامتيدى. ءۇشىنشى دەڭگەي - بۇل تەگىن مەديسينالىق كومەك جانە مەديسينالىق ساقتاندىرۋ جۇيەسىنىڭ پاكەتتەرىنە كىرمەيتىن مەديسينالىق قىزمەتتەر. ولار اقىلى نەمەسە ەرىكتى مەديسينالىق ساقتاندىرۋ ەسەبىنەن ۇسىنىلادى.

«مەديسينالىق كومەك پاكەتتەرىنىڭ جوبالارىن ساراپشىلار ەگجەي-تەگجەيلى پىسىقتادى. ولار وڭىرلەردىڭ دەنساۋلىق ساقتاۋ باسقارمالارىمەن، مۇددەلى مەملەكەتتىك ورگاندارمەن، «اتامەكەن» ۇلتتىق كاسىپكەرلەر پالاتاسىمەن كەلىسىلدى. دەنساۋلىق ساقتاۋ مينيسترلىگىنىڭ قوعامدىق كەڭەسىندە قارالىپ، ماقۇلداندى. بەكىتۋگە ۇسىنىلاتىن مەديسينالىق كومەك پاكەتتەرىن قولداۋدى جانە 2020 جىلدان باستاپ مىندەتتى الەۋمەتتىك مەديسينالىق ساقتاندىرۋ جۇيەسىن تۇراقتى ەنگىزۋ ءۇشىن بارلىق قاجەتتى شارالاردى ىسكە اسىرۋدى قولداۋىڭىزدى سۇرايمىن»، - دەدى ەلجان ءبىرتانوۆ.