اقسۋات اۋىلىندا ءداستۇرلى حالىقارالىق ايتىس ءوتتى. جىل سايىن جىرسۇيەر قاۋىمدى قازاقتىڭ ءتول ونەرىمەن سۋسىنداتىپ كەلە جاتقان شايىرلار بۇل جولى دا اياناپ قالمادى دەپ جازادى Qamshy.kz اقپارات اگەنتتىگى.

جۇرتتىڭ كوكەيىندەگى ويىن ءدوپ باسىپ ايتىپ، ەلدىڭ بىرلىگىن، ىنتىماقتى تىرلىگىن جىرلاعان اقىندار تىڭدارماننىڭ زور قوشەمەتىنە يە بولدى.

ايتىستىڭ جۇرگىزۋشىسى – باياعى ءجۇرسىن ەرمان. قازىلار القاسىنىڭ قۇرامىندا ولەڭنەن ءوز ەنشىلەرىن العان قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت، سەرىك قالييەۆ، داۋلەتكەرەي كاپ ۇلى، باۋىرجان قاليوللا سىندى بەلگىلى اقىندار مەن ءانشى، سازگەر التىنبەك قورازبايەۆ بولدى.

حالىقارالىق دەپ ات ايتىپ تۇرعانداي، بۇل ايتىسقا قازاقستاننان بولەك قىرعىزستان، موڭعوليا، جۇڭگو سەكىلدى كورشى مەملەكەتتەردەن قانداس، باۋىرلاس اقىندارىمىز كەلىپ قاتىستى. ءسوز بارىمتاسىنا تۇسكەن ۇمىتكەرلەر التى جۇپ قۇرادى. وسىلاردىڭ ىشىنەن ۇزدىك شىققان التى اقىنعا كەلەسى اينالىمنىڭ جولداماسى بۇيىردى.

سونىمەن تارباعاتاي اۋدانىنىڭ ورتالىعى اقسۋاتتاعى ايتىستىڭ باس جۇلدەسىنە تىگىلگەن ەكى ميلليون تەڭگە اقشالاي سىيلىقتى قىتايدان كەلگەن اقىن باۋىرىمىز ەرلان امانقوجا ۇلى ولجالادى. ءبىرىنشى ورىندى تارازدان كەلگەن تالانتتى اقىن قانات مىرزاحان يەلەنسە، ەكىنشى ورىن باتىستىڭ اقىن قىزى جانسايا مۋسيناعا، ال ءۇشىنشى ورىن اقسۋاتتىڭ تۋماسى رۇستەم قايىرتايۇلىنا بۇيىردى. ءداستۇرلى جىر باسەكەسىنىڭ ارنايى ستيپەندياسى باياناۋىلدان كەلگەن اسپانبەك شۇعاتايەۆقا بەرىلدى. وسى ايتىستىڭ دەمەۋشىسى ەندى اسپانبەككە جىل بويى 200 مىڭ تەڭگە كولەمىندە شاكىرتاقى تولەپ وتىرادى.