بارقىتبەلدىڭ باۋرايىندا ءدۇبىرلى توي ءوتىپ، ءتول ونەرىمىز تورگە وزعان كۇن بولدى. جۋىقتا عانا ەكى دۇركىن «قازاقستان بارىسى» اتانعان شىعىستىڭ باس بالۋانى ايبەك نۇعىماروۆ ەندى مىنە ىرعىزباي دوسقانا ۇلى اتىنداعى الەمدىك گران-پريدى جەڭىپ الدى دەپ حابارلايدى Qamshy.kz اقپارات اگەنتتىگى.

ماۋسىم ايىنىڭ 14-16 كۇندەرى شىعىس قازاقستان وبلىسىنىڭ تارباعاتاي اۋدانىندا «تۇعىرى بيىك تارباعاتاي» اتتى فەستيۆال ءوتتى. فەستيۆال اياسىندا قازاق كۇرەسىنەن ىرعىزباي دوسقانا ۇلى اتىنداعى الەمدىك گران-پري ءتۋرنيرى ۇيىمداستىرىلدى. وسىمەن جەتىنشى مارتە جالاۋىن جەلبىرەتكەن بىلەكتىلەر باسەكەسىنە دۇنيەجۇزىنىڭ وتىزعا تارتا ەلىنەن 90 بالۋان قاتىسىپ، ءۇش سالماق دارەجەسى بويىنشا ءوزارا مىقتىنى انىقتادى.

ەڭ الدىمەن بوزكىلەمگە 70 كەلى تارتاتىن بالۋاندار شىقتى. جەڭىل سالماقتاعى سپورتشىلار اراسىندا قولا جۇلدەگە مولداۆيا ەلىنىڭ نامىسىن قورعاعان گەوردجە روكۋ قول جەتكىزسە، كۇمىس مەدال وتانداسىمىز وسكەن تولەۋبەكوۆتىڭ ەنشىسىنە بۇيىردى. ال وسى سالماقتاعى التىن مەدال گرۋزيالىق بوزكىلەم شەبەرى زۆياد ودوشەشۆيليدىڭ كەۋدەسىندە جارقىرادى.

سول سياقتى 80 كەلى سالماقتاعى باسەكەدە ءۇشىنشى ورىندى قازاقستاندىق بەكزات ماناسبايەۆ يەلەنسە، كۇمىس جۇلدە گرۋزين كاحا مومۋلاشۆيليگە بۇيىردى. بۇل سالماقتاعى ءبىرىنشى ورىندى تاجىكستان سپورتشىسى حامروز رادجابو جەڭىپ الدى.

بارىنەن دە 80 كەلىدەن جوعارى سالماقتاعى الىپتاردىڭ بەلدەسۋى قىزىقتى بولدى. فينالعا شىققان قوس مىقتى ايبەك نۇعىماروۆ پەن وزبەك بالۋانى مۋحسين حيسومۋدينوۆ جانكۇيەرلەر دەلەبەسىن قوزدىرعان اسا تارتىستى بەلدەسۋ وتكىزدى. دەگەنمەن قيقۋعا قيقۋ قوسقان قالىڭ جانكۇيەردىڭ قولداۋى رۋحتاندىرماي قويسىن با؟! نامىسى قوزىپ، جىگەرى تاسىعان ايبەك بالۋان قارسىلاسىن ۇپاي ايىرماشىلىعىمەن ۇتىپ، وسى ءتۋرنيردىڭ تۇيە بالۋانى اتاندى. كۇمىس مەدالدى وزبەكستاندىق مۋحسين حيسومۋدينوۆ مىسە تۇتسا، گرۋزيالىق گەوردجي كاتارادزەگە بۇيىرعانى قولا بولدى.

- شىعىسقا، ونىڭ ىشىندە اقسۋاتتاي اۋىلعا الەمنىڭ وتىزعا تارتا ەلىنەن سپورتشىلار كەلۋى ۇلكەن جەتىستىك. ءيا، قازاق كۇرەسى جىلدان-جىلعا تانىمال بولىپ كەلەدى. بۇل قۋانارلىق جايت. وسى جولى باعىم جانىپ الەمدىك گران-پريدى يەلەندىم. قارسىلاستارىم دا وسال بولعان جوق ارينە، – دەيدى تۋرنير جەڭىمپازى ايبەك نۇعىماروۆ.