ق ر ءبىلىم جانە عىلىم ءمينيسترى اسحات ايماعامبەتوۆ 2019 جىلى باكالاۆريات بويىنشا جوعارى ءبىلىم الۋعا 53 مىڭنان استام گرانت بولىنگەنىن مالىمدەدى دەپ حابارلايدى  Qamshy.kz اقپارات اگەنتتىگى.

"بيىل باكالاۆرياتقا 53 785 گرانت بولىنەدى. ماگيستراتۋراعا بىلتىرعىداي 13 مىڭنان استام گرانت بەرىلگەن. 2 312 گرانت دوكتورانتۋراعا"، – دەدى ايماعامبەتوۆ.

ونىڭ سوزىنشە، مينيسترلىك ابيتۋريەنتتەردىڭ قانشا گرانت بولىنەتىنىن، قانداي كونكۋرس، قايدا قۇجات تاپسىرۋ قاجەتتىگىن ءبىلىپ وتىرۋىنا ەرەكشە ءمان بەرەدى.

"ولار وسىنىڭ ءبارىن ءبىلىپ وتىرسا، قۇجات تاپسىرعاندا وزدەرى ءۇشىن دۇرىس شەشىم قابىلداي الادى. بيىلعى جىلى گرانتتار كوبىنەسە تەحنيكالىق ماماندىقتار بويىنشا بولىنگەن، ءبىراق الەۋمەتتىك سالانى دا نازاردان شىعارمادىق. مىسالى، ءقازىر ينكليۋزيۆتى ءبىلىم ماسەلەسى كوتەرىلۋدە. سوندىقتان بيىل ءبىز دەفەكتولوگيا بويىنشا گرانتتار سانىن ارتتىردىق"، – دەپ ءتۇسىندىردى مينيستر.