نۇر-سۇلتان قالاسىنىڭ اكىمى التاي كولگىنوۆ قالانى كەزەكتى ارالاۋ كەزىندە قۇرىلىسى ۇزاققا سوزىلعان پروبلەمالى تۇرعىن ءۇي كەشەندەرىنىڭ ۇلەسكەرلەرىمەن كەزدەستى دەپ حابارلايدى Qamshy.kz اقپارات اگەنتتىگى. بۇل تۋرالى جاڭا اكىم Facebook پاراقشاسىندا مالىمدەدى.
"168 ادام قاراجاتىن سالعان "گارانت" كوپپاتەرلى تۇرعىن ءۇي كەشەنىنىڭ قۇرىلىس باسىنا باردىم. ءۇيدى سالۋدى "ازبۋكا جيليا" 2011 جىلى باستاعان. ءقازىر مەملەكەتتىك قولداۋدىڭ ارقاسىندا بۇل وبەكتىنىڭ قۇرىلىسى جالعاسىن تاۋىپ، 2020 جىلدىڭ ءساۋىر ايىندا تاپسىرىلۋ كوزدەلىپ وتىر.
"شۇبار" تۇرعىن الابىنداعى "كومفورت de Luxe" تك ۇلەسكەرلەرىمەن دە سويلەستىم. مۇندا 227 ادام 2012 جىلدان بەرى باسپانالارىن كۇتىپ ءجۇر ەكەن. بۇل وبەكتىنى وسى جىلدىڭ جەلتوقسان ايىندا اياقتاۋ جوسپارلانعان.
قالادا ۇلەسكەرلەردىڭ قارجىسى سالىنعان قۇرىلىسى اياقتالماعان 51 پروبلەمالى وبەكت قالدى. ولاردىڭ قۇرىلىسى بيۋدجەت ەسەبىنەن (قايتارىمدى قاراجات) اياقتالادى.
ءار اپتا سايىن بىر-ەكى پروبلەمالى كوپپاتەرلى تۇرعىن ۇيلەردى ارالاپ تۇرامىن. جوسپارلى كەستە ءتۇزىلدى. قۇرىلىستىڭ اياقتالۋ پروسەسىن جانە سوزىلىپ كەتكەن ۇلەسكەرلەر ماسەلەسىنىڭ تۇبەگەيلى شەشىمىن تابۋدى باقىلاۋدا ۇستايمىن."، - دەلىنگەن قالا اكىمىنىڭ جازباسىندا
پىكىر قالدىرۋ