بۇگىن پارلامەنت ءماجىلىسىنىڭ جالپى وتىرىسىندا دەپۋتات انار جايىلعانوۆانىڭ وكىلەتتىگى مەرزىمىنەن بۇرىن توقتاتىلدى، دەپ حابارلايدى Qamshy.kz اقپارات اگەنتتىگى قازاقپارات سايتىنا سىلتەمە بەرە وتىرىپ.

ەسكە سالا كەتەيىك، جاقىندا عانا انار جايىلعانوۆا قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ ءتوراعاسى بولىپ تاعايىندالعان ەدى.

«سىزگە پارلامەنتتە بىرلەسىپ اتقارعان جۇمىسىڭىز ءۇشىن بارلىق دەپۋتاتتاردىڭ اتىنان العىسىمىزدى بىلدىرەمىز. بارشا ارىپتەستەرىڭىز ءسىزدى بىلىكتى زاڭگەر، تاجىريبەسى جوعارى مامان رەتىندە جاقسى بىلەدى. ماجىلىستە وسى زاڭناما جانە سوت-قۇقىقتىق رەفورما كوميتەتىنىڭ مۇشەسى بولدىڭىز. ەندى جاقىندا مەملەكەتتىك قىزمەت ىستەرى اگەنتتىگىنىڭ ءتوراعاسى بولىپ تاعايىندالدىڭىز. وتە لاۋازىمدى قىزمەت. سوندىقتان بارشا دەپۋتاتتاردىڭ اتىنان وسى جاڭا جۇمىستا ۇلكەن تابىس تىلەيمىز»، - دەدى پارلامەنت ءماجىلىسىنىڭ ءتوراعاسى نۇرلان نىعماتۋلين.

جالپى وتىرىس بارىسىندا انار نۇرالىقىزىنا ارنايى «العىس حات» تاپسىرىلدى.

انار جايىلعانوۆا 1969 جىلى 10 شىلدەدە شىعىس قازاقستان وبلىسى شار اۋدانى بەلتەرەك اۋىلىندا تۋعان. 1986 جىلى بەلتەرەك اۋىلىنىڭ ورتا مەكتەبىن ءتامامداپ، وسى جىلى س.م. كيروۆ اتىنداعى قازاق مەملەكەتتىك ۋنيۆەرسيتەتىنىڭ زاڭ فاكۋلتەتىنە ءتۇسىپ، 1991 جىلى ونى ۇزدىك اياقتادى. 1999 جىلعى جەلتوقساندا قازاقستان رەسپۋبليكاسى پرەزيدەنتى اكىمشىلىگىنىڭ مەملەكەتتىك-قۇقىقتىق ءبولىمىنىڭ اعا ساراپشىسى لاۋازىمىنا اۋىستى.

2000 جىلعى قىركۇيەكتە قازاقستان رەسپۋبليكاسى جوعارعى سوتى ءتوراعاسىنىڭ كەڭەسشىسى، 2004 جىلعى جەلتوقساندا قازاقستان رەسپۋبليكاسى جوعارعى سوتىنىڭ سۋدياسى بولىپ قىزمەت اتقاردى. 2008 جىلى 13 ناۋرىزدا قازاقستان رەسپۋبليكاسى پارلامەنت سەناتىنىڭ قاۋلىسىمەن قازاقستان رەسپۋبليكاسى كونستيتۋسيالىق كەڭەسىنىڭ مۇشەسى بولىپ تاعايىندالدى.