قىرعىز ەلىنىڭ باسشىسى تۇركىستان وبلىسىندا بولعان اپاتتى جاعداي تۋرالى پىكىر ءبىلدىرىپ، زارداپ شەككەندەر مەن قازا تاپقانداردىڭ وتباسىنا كوڭىل ايتتى دەپ جازادى Qamshy.kz اقپارات اگەنتتىگى.
- "مەملەكەت باسشىسى قاسىم-جومارت توقايەۆ پەن قىرعىزستان پرەزيدەنتى سوورونباي جەەنبەكوۆ تەلەفونمەن سويلەستى. كورشى ەلدىڭ پرەزيدەنتى ارىس قالاسىندا بولعان توتەنشە جاعدايدان زارداپ شەككەندەر مەن قازا تاپقاندارعا كوڭىل ايتتى"، - دەپ حابارلادى اقوردانىڭ باسپا ءسوز قىزمەتى.
قىرعىز ەلىنىڭ باسشىسىنىڭ ايتۋى بويىنشا، قازاق جەرىندە بولعان جارىلىستاردىڭ جانىنا باتقانىن جەتكىزدى.
توقايەۆ ءوز كەزەگىندە جەەنبەكوۆكە قىرعىزستاننىڭ باۋىرلاس كوڭىلى ءۇشىن العىس ايتتى.
بۇدان بولەك، رەسەي فەدەراسياسىنىڭ قورعانىس ءمينيسترى سەرگەي شويگۋ قازاقستاننىڭ قورعانىس ءمينيسترى نۇرلان ەرمەكبايەۆپەن تەلەفون ارقىلى سويلەسىپ، جارىلىستاردان زارداپ شەككەن تۇرعىندارعا كوڭىل ايتتى. سونداي-اق، ارىستاعى جارىلىس سالدارىنان بولعان ءورتتى اۋىزدىقتاۋعا كومەك بەرۋگە دايىن ەكەنىن جەتكىزدى.
پىكىر قالدىرۋ