استانادا قاۋىپسىزدىك كەڭەسىنىڭ وتىرىسى ءوتتى دەپ جازادى Qamshy.kz اقپارات اگەنتتىگى. كەڭەستى قاۋىپسىزدىك كەڭەسىنىڭ ماڭگىلىك ءتوراعاسى نۇرسۇلتان نازاربايەۆ باسقاردى. جيىندا ارىس قالاسىنداعى قازىرگى احۋال جانە ەلىمىزدىڭ سۋ قاۋىپسىزدىگىن قامتاماسىز ەتۋ ماسەلەلەرى تالقىلاندى. سونداي-اق كەڭەسكە پرەزيدەنت قاسىم-جومارت توقايەۆ جانە قاۋىپسىزدىك كەڭەسىنىڭ مۇشەلەرى قاتىستى.
"سوڭعى اقپاراتقا سايكەس، زارداپ شەككەندەردىڭ سانى 160-تان استى. بارشا قازاقستاندىق بىرلىگىمىزدىڭ بەكەم ەكەنىن كورسەتىپ جاتقانىن اتاپ وتكىم كەلەدى. ەلىمىزدىڭ ءار تۇكپىرىنەن ازاماتتار الاڭداۋشىلىق بىلدىرۋدە، ءتۇرلى ۇيىمدار مەن كاسىپورىنداردىڭ جۇمىسكەرلەرى زارداپ شەككەندەرگە كومەك كورسەتۋ ءۇشىن بىرىگىپ جاتىر. ءبىر ءوڭىردىڭ باسىنا تۇسكەن قيىنشىلىق – بارىمىزگە ورتاق ماسەلە. ءبىز حالقىمىزدىڭ ىنتىماعىنىڭ ارقاسىندا بارلىق قيىندىقتى ەڭسەرەمىز. بارشا قازاقستاندىقتارعا ريزاشىلىعىمدى بىلدىرەمىن"، – دەدى نازاربايەۆ.
وتىرىستىڭ سوڭىندا ارىس قالاسىندا جوندەۋ جۇمىستارىن جۇرگىزۋ جانە ازاماتتاردىڭ تۇرعىلىقتى جەرىنە ورالۋىن ۇيىمداستىرۋ جونىندە ناقتى تاپسىرمالار بەرىلدى.
پىكىر قالدىرۋ