ارىس قالاسىنىڭ مىڭداعان تۇرعىنىن ابىگەرگە سالىپ، بىرنەشە ادامنىڭ ءومىرىن جالماپ، قانشاما ادامنىڭ دەنساۋلىعىنا زالال كەلتىرگەن اپاتتى جاعدايدان ءيىسى قازاقتىڭ تۇگەلى حاباردار. اياعى جەتكەندەر ارىسقا اتتانىپ، قالعانى ىشتەي تىلەۋلەس بولىپ وتىر.
شۇكىر، ەل ەكەنبىز!
قازاقتىڭ قازاقتىعىن ساقتاپ كەلە جاتقان – شۇكىر مەن تاۋبە. قازاقتىڭ العا جىلجىپ، ءوز بەتىنشە كۇرەپ اقشا تاپپاۋىنىڭ، كاسىپپەن اينالىسپاۋىنىڭ دا باستى سەبەبىنىڭ ءبىرى – وسى.
ارىستاعى اپاتتىڭ سالدارىمەن كۇرەسۋگە قورعانىس مينيسترلىگى تاراپىنان، ىشكى ىستەر مينيسترلىگىنەن مىڭداعان اسكەري قىزمەتكەر مەن جۇزدەگەن ارنايى تەحنيكا ءبولىندى. بۇل – اپاتتان زارداپ شەككەندەرگە مەملەكەت تاراپىنان جاسالعان كومەك.
ال ارىستىقتار جارىلىس شىققان ساتتە-اق قالانى تاستاپ، باسى اۋعان جاققا قاشتى. ءبىرى شىمكەنتكە، ەكىنشىسى تۇركىستانعا دەگەندەي. كولىگى جوقتار قىر باسىنا شىعىپ، وت قۇشاعىنا ورانعان كىشى وتاندارىن سىرتتان باقىلاپ، ىشتەي دۇعا تىلەۋدەن ارى اسا المادى.
شىمكەنت قالاسىنىڭ بارشا تۇرعىنى باسىنا كۇن تۋىپ، كىرىپتار بولىپ كەلگەن حالىقتىڭ الدىنان قولدارىنا تۇسكەن دۇنيەسىن الا ۇمتىلدى. جەلىدە تاراعان قولىنا سۋ، نان ۇستاپ جول شەتىندە تۇرعاندار، راسىندا، جۇرەكتى ەلجىرەتەدى-اق. بەيبىت كۇندە بىر-بىرىمەن كوزقاراسى ساي بولماي، ساياسي ۇستانىمى سايكەس كەلمەي جۇرەتىن ەلدىڭ جۇمىلعان جۇدىرىقتاي بىرىگە كەتكەنى ىشتەگى رۋحتى ءبىر كوتەرىپ تاستادى.
ءار ايماقتان جۇك كولىگىمەن، پويىزبەن اعىلعان قانشاما كومەك مىڭداعان ادامنىڭ يگىلىگىنە جۇمسالىپ جاتىر. ەلدىڭ باعىتى جاقسىلىق جاساۋدان جارىسۋعا ويىسىپ كەلەدى ەكەن. وسى بەتالىستى بۇراتىنداردىڭ ءجۇزى كۇيگەي.
دالادا قالعان قازاق كەمدە-كەم
جەرگىلىكتى اكىمشىلىك باسقارۋدىڭ ارقاسىندا، حالىقتىڭ ارقاسىندا ارىستان باس ساۋعالاعان قانداستار مەشىتتەرگە، مەكتەپتەرگە، ءتىپتى، ۇيلەرگە ءبولىنىپ ءتۇسىپ جاتتى. ءار جەردە لاگەر، ارنايى شتاب قۇرىلىپ، جاۋاپتى ادامدار بەكىتىلدى.
ءار ايماقتان جومارت جاندار قالتالارىنىڭ كولەمىنە قاراي قاراجات اۋدارىپ، شاما-شارقىنشا كىسىلىك كورسەتىپ جاتىر. مەملەكەت باسشىسى قاسىم-جومارت توقايەۆتان باستاپ، بىرنەشە كاسىپورىن، مەملەكەتتىك مەكەمە قىزمەتكەرلەرى ءبىرى جارتى تابىسىن، ءبىرى ءبىر كۇندىك جالاقىسىن اۋدارىپ جاتىر. ەلدىكتىڭ بەلگىسى ەمەس پە؟
ۋادە ەتىلدى، ورىندالار
ارىستا اپات ورىن العان كۇنى مەملەكەت باسشىسى قاسىم-جومارت توقايەۆ وقيعا ورىنىنا ارنايى كەلىپ، حالىقتىڭ احۋالىمەن تانىستى، جاۋاپتى قىزمەتكەرلەرگە تاپسىرما بەردى.
«اقشا بولىنەدى»، - دەپ باسا ايتقان پرەزيدەنت ءسوزىنىڭ دالادا قالماسى انىق قوي. ال قىرىق بەس مىڭنان استام ادامنىڭ دالادا قاڭعىپ كەتپەيتىنى ەكىباستان انىق قوي.
ءقازىر حالىقتىڭ اراسىندا ارانداتۋشىلار بەلسەندى جۇمىس جاساۋدا. «قۇلاننىڭ قاسۋىنا، مىلتىقتىڭ باسۋى» دەگەندەي، ۇرىمتال جەردەن جامباسقا باسۋدى كوزدەگەن ساسىق پەيىلدى ازاماتتار دا از ەمەس.
«ۇيلەردى جوندەۋگە اقشا بولەمىز. ۇكىمەت ەسەپتەيدى، ءبىز قاراجات بولەمىز. ۋايىمداماڭدار، ءبارى دۇرىس بولادى»، - دەگەن پرەزيدەنت سوزىنە سەنىمسىزدىك تانىتقاندار جەرگىلىكتى ايماقتىڭ اكىمدەرىن ءتۇتىپ جەۋدە.
ەل اراسىندا «بىزگە جوندەلگەن ءۇي كەرەك ەمەس، بىزگە جاڭا ءۇي كەرەك»، - دەپ دۇنيە داۋلاعان قانداستار دا تابىلدى. بۇل – استىنداعى اتىن قوناعىنا سويىپ بەرىپ، ەرتەسىنە جۇگەن ۇستاپ قالا بەرەتىن اردا قازاقتىڭ قانىندا بار ەرەك قاسيەتكە سىن.
ءۇي جوندەلەر، ۋاقىت وتەر، سوسىن قايتپەكپىز؟ انا شىرىلداعان بالالاردىڭ تاعدىرى نە بولماق؟ ارىستا ءتورت رەت قايتالانعان اپاتتىڭ بەسىنشى رەت ورىن الماۋىنا نەدەي كەپىلدىك بار؟
مىنە، وسىنداي سۇراقتار ادام جيىلعان جەرلەردە مىنبەردەن ايتىلماي قالىپ جاتىر. حالىققا قولداپ اقشا تاراتقانداردىڭ ۆيدەوسى، كوپ ادام ءولدى دەگەن جالعان اقپاردى تاراتۋعا قۇمارتقاندار بارشىلىق.
ەل بولۋ ءۇشىن بىرلىك كەرەك! وسىنداي الاساپىران وقيعالار ۋاعىندا ءاربىرىمىز تەك ادامدىق بيىكتەن ويلانىپ، قۋ دۇنيەنىڭ، قۋ قۇلقىننىڭ قامى ءۇشىن بايبالام سالماي، ەل تاعدىرىن، بولاشاق بالالار تاعدىرىن جاۋاپتىلار قولىنا ءبىر ءسات تاپسىرىپ نەگە كورمەسكە؟!
پىكىر قالدىرۋ