ارىس قالاسىنىڭ تۇرعىندارى تاڭعى ساعات 06:00-دە شىمكەنت قالاسى، بەكجان بازارىنىڭ تۇسىندا ورنالاسقان "اقمەشىت" مەشىتىنەن ءوز ۇيلەرىنە اتتاندى دەپ جازادى Qamshy.kz اقپارات اگەنتتىگى.
حالىق ارىس قالاسىندا ورىن العان توتەنشە جاعدايعا بايلانىستى قاۋىپسىزدىكتى ساقتاۋ بويىنشا جادىناماعا ساي ارەكەت ەتپەك.
تاڭ بەلەڭ العان تۇستا قولىندا بار زاتتارىن جيناپ، قالا حالقى جولعا شىقتى. بۇل تۋرالى ياكوۆ ءفودوروۆ ەسىمدى Facebook جەلىسىنىڭ قولدانۋشىسى ءوز پاراقشاسىنا ۆيدەو جۇكتەگەن بولاتىن.
تۇركىستان وبلىسى اكىمىنىڭ كەڭەسشىسى ساكەن قالقامانوۆ حالىقتىڭ سول ۋاقىتتاعى كوڭىل-كۇيىن سۇراپ، اق جول تىلەدى.
پوليسيا قىزمەتكەرلەرىنىڭ باستاۋىمەن تۇرعىندار قالاعا كىردى.
ارىس قالاسىنا حالىقتى شىمكەنتتەن 135 اۆتوبۋس تاسىمالداۋدا. جالپى باس-اياعى 30 مىڭنان استام ادام تىركەلگەن ەۆاكۋاسيالىق ورىنداردان حالىقتى قالاعا كوشىرۋ جۇمىسى ويداعىداي اتقارىلۋدا. بەيسەن تاجىبايەۆ جۇكتەگەن ۆيدەودا ارىسقا كىرىپ كەلە جاتقان حالىقتى كورۋگە بولادى.
باسشىلىق ادامدارى قاراپايىم حالىقپەن بىرگە ءار ۇيگە كىرىپ شىقتى. حالىق قولدارىنا تاپسىرىلعان ەرەجەگە ساي جۇمىس ىستەپ جاتىر.
"الداعى ۋاقىتتا ەشقانداي اپات بولماسا ەكەن"،- دەگەن قورقىنىشپەن ۇيلەرىنە جەتكەن حالىقتىڭ ۇرەيى سالدە بولسا باسىلعانداي. مەكەمەلەر وزدەرىنىڭ جۇمىستارىن باستاپ كەتتى. ارىس قالاسىنا جينالعان اقشامەن ۇيلەردىڭ قۇرىلىسىن ەرتەرەك اياقتاپ، بارلىعى قاۋىپسىزدىكتە بولسا ەكەن دەيمىز.
پىكىر قالدىرۋ