كۇنى كەشە نۇر-سۇلتان قالاسىندا ديماش قۇدايبەرگەننىڭ "ارناۋ" اتتى كونسەرتى ءوتتى دەپ جازادى Qamshy.kz اقپارات اگەنتتىگى.
قالا باسشىلىعى كونسەرتتىڭ تىنىش ءارى ءقاۋىپسىز ءوتۋى ءۇشىن بارلىق جاعدايدى جاسادى. الدىمەن، كوشەنىڭ ءبىرقاتار بولىگىن جاۋىپ، ودان كەيىن كونسەرت وتكەن ورىنعا ارنايى اۆتوبۋستار ءبولدى.
كونسەرتتى ۇيىمداستىرۋشىلاردىڭ ايتۋىنشا، شارانى ءوز دارەجەسىندە وتكىزۋگە 350-دەن استام ەرىكتى اتسالىسقان. ال كونسەرتكە كورەرمەن رەتىندە 10 مىڭنان استام كورەرمەن جينالىپتى.
ساحنادا ءان شىرقاعان ديماش قانىپەزەرلەر قولىنان قازا تاپقان سپورتشى، مانەرلەپ سىرعاناۋدان وليمپيادانىڭ قولا جۇلدەگەرى دەنيس تەنگە جەكە كومپوزيسيا ارنادى.
"دەنيس تەن ەكەۋمىز دۋەت ايتۋدى جوسپارلاعانبىز. وكىنىشكە وراي، ول جوسپارىمىز ەندى ماڭگى ورىندالمايدى. دەنيس كوپ جۇمىس جاسايتىن تالانتتى جىگىت ەدى. ول – ءبىزدىڭ ەلىمىزدىڭ ەڭ جارقىن ازاماتتارىنىڭ ءبىرى. دەنيستىڭ بەينەسى ءبىزدىڭ جۇرەگىمىزدە ماڭگى ساقتالماق"، - دەدى ءانشى.
ءان سوڭىندا ديماش دەنيستىڭ اتا-اناسىن قۇرمەتتى قوناق رەتىندە ساحنا تورىنە شاقىرىپ، گۇل ۇسىنىپ، سىي كورسەتتى.
سونداي-اق، ءانشى كونسەرتتەن تۇسكەن اقشانىڭ جارتىسىن ارىستىقتارعا اۋداراتىنىن ايتىپ، حالىقتى ءبىر قۋانتتى.
"مەن ءجيى-جيى شەتەلدە بولسام دا، ەلىمىزدەگى جاعدايلاردى نازاردان تىس قالدىرمايمىن. جاقىندا ارىس قالاسىندا جارىلىس ورىن الدى. مەن وسى كونسەرتتەن تۇسكەن اقشانىڭ جارتىسىن ارىس قالاسىنىڭ تۇرعىندارىنا اۋدارامىن"، - دەدى ديماش ساحنادا تۇرىپ.
ديماشتىڭ كونسەرتىنىڭ تولىق نۇسقاسى:
پىكىر قالدىرۋ