جاقىندا عانا جارىلىس بولعان ارىس قالاسىنداعى اسكەري ءبولىم ەشقايدا كوشپەتىن بولدى دەپ جازادى Qamshy.kz اقپارات اگەنتتىگى. 

ەرميان بياتوۆ، قورعانىس مينيسترلىگى «وڭتۇستىك» وڭىرلىك قولباسشىسىنىڭ ورىنباسارى:

–ارىستاعى گارنيزوندا اسكەري ءبولىم وسىندا قالا بەرەدى. ءبىراق قالاعا ءقاۋىپسىز بولادى. جارىلعىش زاتتار جينالىپ بىتكەننەن كەيىن ولار ارىستان 60 شاقىرىم جەردەگى ارنايى پوليگونعا اپارىلىپ، تۇگەل كوزى جويىلادى،- دەيدى.

ارىس قالاسىنان ءالى كۇنگە دەيىن تابىلعان بارلىق سناريادتاردى اسكەريلەر جيناپ الدى. ارىستا قازىرگى ەسەپ بويىنشا 27 ءۇي جارامسىز بولىپ قالعان، ونىڭ 21ء-ى ورتەنىپ كەتكەن. ءدال قازىرگى ساتتە حالىققا قاجەتتىلىگى جوعارى نىسانالار ءوز جۇمىسىن باستاپ كەتكەن. ەڭ باستىسى نانمەن قاماتاماسىز ەتىپ وتىرعان ناۋبايحانا جۇمىس جاساۋدا.

مۇرات قادىربەك، ارىس قالاسىنىڭ اكىمى:

–سۋ جانە ەلەكتر ەنەرگياسى تولىعىمەن بەرىلگەن. بارلىق تاسىمالداۋشى مەكەمەلەر جۇمىسىنا كىرىستى. قالاداعى ءۇش ناۋبايحانا نانمەن حالىقتى قامتاماسىز ەتىپ وتىر. جانە قالا اۋماعىندا 20-دان استام ازىق-تۇلىك دۇكەندەرى تولىعىمەن جۇمىس ىستەپ  جاتىر،- دەدى.

ەستەرىڭىزگە سالا كەتەيىك ارىس قالاسىنداعى جارىلىس 24-مامىر تاڭعى ساعات 09:00 دە باستالعان بولاتىن. دەر كەزىندە قالا حالقى ەۆاكۋاسيالانىپ، تۇركىستان وبلىسىنداعى مەكتەپ، ۇيلەرگە ورنالاستىرىلعان. 28-مامىر كۇنى ارىستىقتار قايتادان ۇيلەرىنە قايتقان ەدى.