قوعامدىق كەڭەستىڭ كەڭەيتىلگەن وتىرىسىندا مۇمكىندىگى شەكتەۋلى جاندارعا قاتىستى وزەكتى ماسەلەلەر تالقىلاندى دەپ حابارلايدى Qamshy.kz اقپارات اگەنتتىگى اتىراۋ وبلىسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.

اتىراۋدا وبلىس اكىمى نۇرلان نوعايەۆتىڭ توراعالىعىمەن قوعامدىق كەڭەستىڭ كەڭەيتىلگەن وتىرىسى ءوتتى. كەڭەسكە قوعامدىق بىرلەستىكتەر مەن عىلىمي-وندىرىستىك بىرلەستىك مۇشەلەرى، مۇمكىندىگى شەكتەۋلى جاندارعا بايلانىستى سۇراقتاردىڭ جاۋابىن الۋ ءۇشىن كەلگەن تۇرعىندار قاتىستى. جيىنعا قاتىسۋشىلار وڭىردەگى مۇمكىندىگى شەكتەۋلى جاندارعا قاتىستى ماسەلەلەردى تالقىلادى.

قازىرگى تاڭدا اتىراۋ وبلىسىندا ءار ءتۇرلى توپتارعا جاتاتىن 22 مىڭنان استام مۇمكىندىگى شەكتەۋلى جاندار بار. قوعامدىق كەڭەستىڭ ءتوراعاسى مۇرات وتەشيەۆتىڭ ايتۋىنشا، مۇگەدەكتەر ءۇشىن قالادا، وبلىستا ورنالاسقان الەۋمەتتىك نىسانداردا، مادەنيەت، سپورت جانە بيزنەس نىساندارىندا پاندۋستاردىڭ جوقتىعى وزەكتى ماسەلە بولىپ وتىر.

"كەيبىر مەكەمەلەر مەن نىساندارداعى پاندۋستار ستاندارتتارعا سايكەس كەلمەيدى. جاڭادان سالىنىپ جاتىرعان نىساندار، مۇگەدەكتەر ارباسى كوتەرىلەتىن پاندۋستارسىز سالىنۋدا"،- دەيدى مۇرات وتەشيەۆ.

اتىراۋ قالاسىنىڭ اكىمى اليمۇحاممەد قۇتتۇمۇرات ۇلىنىڭ ايتۋىنشا، مۇمكىندىگى شەكتەۋلى جانداردان تۇسكەن كوپتەگەن شاعىمدار بويىنشا ارنايى جۇمىس كوميسسياسى قۇرىلدى. كوميسسيا مۇشەلەرى بارلىق نىسانداردى ارالاپ، كوپتەگەن بۇزۋشىلىقتاردى انىقتادى.

"اتىراۋ قالاسى بويىنشا بەلگىلەنگەن ستاندارتتارعا سايكەس كەلمەيتىن 1864 پاندۋس انىقتالدى. 30 شىلدەگە دەيىن جوعارىدا كورسەتىلگەن بارلىق مەكەمەلەر مەن نىسان يەلەرىنە بۇزۋشىلىقتاردى جويۋ نەمەسە ليفت ارقىلى كوتەرەتىن قۇرىلعىلار ورناتۋ تاپسىرىلدى. بۇگىنگى تاڭدا 712 پاندۋستار قايتا قالپىنا كەلتىرىلدى، قالعاندارى ايتىلعان مەرزىمگە دەيىن جاسالاتىن بولادى"،- دەيدى اليمۇحاممەد قۇتتۇمۇرات ۇلى.

عىلىمي-وندىرىستىك بىرلەستىك جانە قوعامدىق بىرلەستىك وكىلدەرىن ينۆاتاكسي جەتىسپەۋشىلىگى، مۇمكىندىگى شەكتەۋلى جانداردى جۇمىسقا ورنالاستىرۋ جانە ساناتوريالىق-كۋرورتتىق ەمدەۋ، جەكە كومەكشىلەرگە ەڭبەكاقى تولەۋ ماسەلەلەرى الاڭداتادى.

ءوز كەزەگىندە اتىراۋ وبلىسىنىڭ اكىمى نۇرلان نوعايەۆ مەملەكەتتىك مەكەمەلەردىڭ باسشىلارى مەن بيزنەس نىساندارىنىڭ يەلەرىنە مۇمكىندىگى شەكتەۋلى جانداردىڭ ماسەلەلەرىن شەشۋگە شاقىردى.

"كەز كەلگەن ۋاقىتتا ءارقايسىمىز وسىنداي ومىرلىك جاعدايعا تاپ بولۋىمىز مۇمكىن. سوندىقتاندا بىزدەر مۇمكىندىگى شەكتەۋلى جاندارعا بارلىق جاعدايدى جاساۋىمىز قاجەت. ەگەردە پاندۋستار سالۋ ءۇشىن، مۇگەدەكتەرگە ارنالعان بولمەلەر قاجەت بولاتىن بولسا، قاراجات بولەمىز. ينۆوتاكسي قاجەت بولسا الدىرايىق. مۇنداي جاعدايعا قايىرىمدىلىق جاعىنان قاراۋعادا بولادى. ءبىز بارلىق ماسەلەلەردى بىردەن شەشە المايمىز، ءبىراق ءبىز شەشۋ جولدارىن قاراستىرۋىمىز كەرەك"،- دەيدى نۇرلان نوعايەۆ جيىنعا قاتىسۋشىلارعا.

اتىراۋ وبلىستىق دەنساۋلىق ساقتاۋ باسقارماسىنىڭ باسشىسى مانشۇك ايمۋرزييەۆانىڭ ايتۋىنشا، اۋدانداردا مۇمكىندىگى شەكتەۋلى جاندار ءۇشىن كۇندىزگى وڭالتۋ ورتالىقتارى اشىلۋدا. بۇل ورتالىقتار تەك ەرەسەك ادامدارعا عانا ەمەس، بالالارعا دا ارنالعان.