ارىستى استاڭ-كەستەڭ ەتكەن وق-دارىلەر قالا ىرگەسىنەن شىعارىلادى. بۇل جۇمىس ەكى اپتادان سوڭ قولعا الىنباق. ءقازىر دايىندىق جۇمىستارى ءجۇرىپ جاتىر دەپ حابارلايدى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ.

الايدا، ارسەنالداردىڭ قايدا جەتكىزىلەتىنى بەلگىسىز. قورعانىس ءمينيسترى نۇرلان ەرمەكبايەۆ بۇل جايلى مالىمەت بەرە المايمىن دەيدى. ال، اينالدىرعان بىرنەشە ساعاتتىڭ ىشىندە قيراپ قالعان قالانى قالپىنا كەلتىرۋگە 35 ملرد تەڭگەدەن استام قارجى قاجەت. 

نۇرلان ەرمەكبايەۆتىڭ ايتۋىنشا، جارىلىستىڭ نەدەن بولعانى جان-جاقتى تەكسەرىلىپ جاتىر. كىنالىلەر قاتاڭ جازاعا تارتىلادى. ەشكىم دە ولارعا قورعان بولىپ، جاسىرىپ-جاپپايدى. ال، اپاتقا قاتىستى بىرنەشە بولجام قاراستىرىلۋدا. ونىڭ ىشىندە ءوق-دارى ساقتالعان قويماعا قاساقانا وت قويىلۋى مۇمكىن دەگەن نۇسقا دا بار. 

–سالعىرتتىق بولۋى مۇمكىن. تەز جاناتىن زاتتاردىڭ تۇتانۋى، ەلەكتر سىمداردىڭ تۇيىقتالۋى، ءتىپتى ادەيى ءورت قويۋى دا مۇمكىن. بۇگىندە ءبىز بىردە-بىر سەبەپتى جوققا شىعارمايمىز. سوندىقتان ارنايى تەرگەۋ توبىنىڭ جۇمىسى ءوز ناتيجەسىن بەرەدى دەگەن سەنىم بار، - دەدى قورعانىس ءمينيسترى نۇرلان ەرمەكبايەۆ. 

ال قالا ىرگەسىنەن ەشقايدا كوشىرىلمەيتىن اسكەري بولىمدە تەك كۇزەتكە ارنالعان وق-دارىلەر عانا  قالماق. 

كوپ بولىگى بۇلىنگەن شاھاردى قالپىنا كەلتىرۋگە جۋىردا ايتىلعانداي 20 ملرد ەمەس، 35 ملرد تەڭگەدەي قارجى قاجەت. پرەمەر- ءمينيستردىڭ ءبىرىنشى ورىنباسارى-قارجى ءمينيسترى ءاليحان سمايىلوۆتىڭ سوزىنشە، بۇل اقشا بىرنەشە باعىت بويىنشا جۇمسالادى. ونىڭ ىشىندە ارىستىقتارعا تولەنەتىن وتەماقى دا بار ەكەن. 

–الدىن الا ەسەپتەۋگە سايكەس،  34،5 ملر تەڭگە كەرەك. سونىڭ ىشىندە ءاربىر تۇرعىنعا 100 مىڭ وتەماقى تولەۋ ءۇشىن  4،5 ملرد، ۇكىمەت رەزەرۆىنەن 2  ملرد، تۇركىستان رەزەرۆىنەن 1 ملرد، قايىرىمدىلىق ەسەبىنەن 1،5 ملرد قارجىلاندىرادى، - دەدى ءاليحان سمايىلوۆ.