الماتىدا 6 شىلدە كەشكى 19.00-دەن باستاپ پوليسيا بالۋان شولاق سپورت كەشەنىنىڭ ماڭىندا جۇرگەن 100-دەن اسا ادامدى ۇستادى دەپ جازادى Qamshy.kz اقپارات اگەنتتىگى. 

وقيعا ورنىنا ارنايى بارعان قامشى ءتىلشىسى پوليسيانىڭ ادامداردى ەشقانداي سەبەپسىز ۇستاعانىن كورگەن.  پوليسيا وكىلدەرى الدىمەن تەك ەر ادامداردى ۇستادى. سوسىن سول ماڭدا جۇرگەن بارلىق ادامداردى جاپپاي ارنايى پوليسيا كولىكتەرىنە كۇشپەن كىرگىزىپ الىپ كەتتى. ادامدار پوليسيا ۇستاعاننان كەيىن "شال كەت!"، "العا، قازاقستان!"، "ويان، قازاقستان!" "شالدىڭ قۇلدارى جىبەرىڭدەر!"  دەپ ايعايلادى. پوليسيا ۇستاعانداردىڭ اراسىندا ەگدە جاستاعى ايەل ادامدار دا بار.

الماتىدان بولەك ءدال وسى كۇنى نۇر-سۇلتان، شىمكەت قالالارىندا دا ادامداردى ۇستاعان. 

قازاقستاندا تيىم سالىنعان "قازاقستاننىڭ دەموكراتيالىق تاڭداۋى" قوزعالىسىنىڭ جەتەكشىسى، ەۋروپادا تۇرىپ جاتقان ەكس-بانكير مۇحتار ءابليازوۆ بۇعان دەيىن الەۋمەتتىك جەلىلەر ارقىلى 6 شىلدە قازاقستان حالقىن قازىرگى بيلىككە قارسى نارازىلىققا شىعۋعا شاقىرعان.