بۇگىن، مەرەكە كۇنى نۇر-سۇلتان جانە الماتى قالاسىندا ميتينگ ءوتتى. شەرۋگە شىققانداردىڭ ىشىندە ەگدە جاستاعى ايەل ازاماتشا شەپ قۇرىپ تۇرعان پوليسەيلەردىڭ الدىندا تىزەرلەدى. بۇل ۆيدەونى تۇرعىمباي ەرجان ءوزىنىڭ Youtube ارناسىنا جۇكتەدى دەپ جازادى Qamshy.kz اقپارات اگەنتتىگى. 

الاڭعا شىققان ايەل:

"ەشكىمگە تيىسپەڭدەرشى، قويىڭدارشى، ءوتىنىش!"،- دەپ پوليسيا الدىندا تىزە بۇكتى. سول جەردە جۇرگەن باسقا دا ايەلدەر ونى ورنىنان تۇرعىزىپ، ولاي جاساماۋىن سۇرادى. تىزە بۇككەن ازاماتشانى ۇستاپ الىپ كەتپەك بولعان پوليسەيلەرگە شەرۋ بەلسەندىلەرى قارسى شىقتى.  بارلىق ايەلدى الىپ كەتۋگە قۇزىرلى ورگان ءماجبۇر بولدى.

ۆيدەودا ۇستىنە ەلىمىزدىڭ كوك تۋىن جامىلىپ، باسىنا تاقيا كيىپ العان ەر ازامات اياعى جەرگە تيەر-تيمەس بولىپ، ءتارتىپ ساقشىلارىنىڭ قولىندا كەتىپ بارا جاتىپ "ويان، قازاق!" دەپ ۇرانداپ بارادى.

ەستەرىڭىزگە سالا كەتەيىك، باس پروكۋراتۋرا بۇل ميتينگتىڭ زاڭسىز دەپ تابىلاتىنىن الدىن-الا ايتقان بولاتىن.

قدت ەكسترەميستىك توپ رەتىندە تىركەلىپ، ەل كولەمىندە شەكتەۋ قويىلعان قوزعالىس بولىپ تابىلادى.