قازاقستان جوعارعى سوتىنىڭ كاسساسيالىق القاسى دەنيس تەننىڭ ولىمىنە قاتىستى ءىس بويىنشا سوتتالعان جانار تولىبايەۆانى قاۋىپسىزدىگى ورتاشا كولونياعا قايتارۋدى سۇراعان باس پروكۋروردىڭ تالابىن قاناعاتتاندىردى دەپ حابارلايدى Qamshy.kz اقپارات اگەنتتىگى.
2019 جىلدىڭ 13 ناۋرىز كۇنى الماتى قالالىق سوتى جانار تولىبايەۆنىڭ جازاسىن جەڭىلدەتۋگە شەشىم قالبىلدادى. سوت ونى كامەلەتكە تولماعان ەكى بالانى تاربيەلەپ وتىرعانىن ەسكەرىپ، ورتاكۇزەت كولونياسىنان قونىس كولونياسىنا اۋىستىرعان بولاتىن.
ەسكە سالا كەتسەك، جانار تولىبايەۆا 2019 جىلدىڭ 6 ناۋرىزىندا ۇل بوساندى. وسىعان بايلانىستى سوتتالۋشىنىڭ ادۆوكاتى امانگەلدى سارييەۆ جازانى وتەۋ مەرزىمىن كەيىنگە قالدىرۋدى سۇراعان بولاتىن. تولىبايەۆا ءسابيدىڭ اكەسى ارمان قۇدايبەرگەنوۆ ەكەنىن ايتقان ەدى. ول دا دەنيس تەننىڭ ولىمىنە قاتىستى ءىس بويىنشا سوتتالدى.
وكسانا تەننىڭ ويىنشا، تولىبايەۆا كەزدەيسوق كۋاگەر ەمەس، سول قىلمىسقا سەرىكتەس بولعان.
"ءبىز باس پروكۋراتۋراعا مۇنداي شەشىم ءۇشىن العىسىمىزدى بىلدىرەمىز. تولىبايەۆا تەك كەزدەيسوق كۋاگەر ەمەس، قىلمىستىق ءىستىڭ سەرىكتەسى بولعان دەپ سانايمىز"، - دەدى وكسانا تەن.
سوت وتىرىسىندا تولىبايەۆانىڭ ادۆوكاتى ىزىمبايەۆ باس پروكۋروردىڭ نارازىلىعىن قابىلداماۋدى جانە ەكىنشى ينستانسيا سوتىنىڭ شەشىمىن كۇشىندە قالدىرۋدى سۇرادى. الايدا سوت ەكىنشى ينستانسيا سوتىنىڭ شەشىمىن جويدى.
پىكىر قالدىرۋ