ق ر پرەمەر-مينيسترى اسقار مامين ارىس قالاسىنداعى زارداپ شەككەن ۇيلەردى، الەۋمەتتىك نىساندار مەن ينجەنەرلىك جەلىلەردى قالپىنا كەلتىرۋ جۇمىستارىنىڭ بارىسىمەن تانىسۋ ماقساتىندا  جۇمىس ساپارىمەن تۇركىستان وبلىسىنا باردى دەپ حابارلايدى Qamshy.kz اقپارات اگەنتتىگى ق ر پرەمەر-مينيسترىنىڭ باسپا ءسوز قىزمەتىنە سىلتەمە جاساپ.

ق ر ۇكىمەتىنىڭ باسشىسى وڭىرلىك شتابتار جۇمىسىن تەكسەرىپ، «كوكتەم-1»، «كوكتەم-2» ىقشام اۋداندارىنداعى تۇرعىن ۇيلەردىڭ، مەكتەپ، بالاباقشا، تەمىر جول ۆوكزالى عيماراتتارىنىڭ، قالالىق اۋرۋحانانىڭ قالپىنا كەلتىرىلۋ قارقىنىن كوردى. ق ر پرەمەر-مينيسترى سونىمەن قاتار حالىققا قىزمەت كورسەتۋ ورتالىعىنا باردى. تۇركىستان وبلىسىنىڭ شتابىندا اسقار مامينگە ارىس قالاسىنىڭ تۇرعىندارىنا 100 مىڭ تەڭگەدەن وتەماقى تولەۋ بويىنشا جۇرگىزىلىپ جاتقان جۇمىستار تۋرالى باياندالدى. 

نىسانداردى ارالاۋ قورىتىندىسى بويىنشا ق ر پرەمەر-مينيسترى اسقار ءماميننىڭ توراعالىعىمەن ارىس قالاسىن قالپىنا كەلتىرۋ ماسەلەلەرى جونىندە كەڭەس ءوتتى. 

تۇركىستان وبلىسىنىڭ اكىمى ءو. شوكەيەۆ قالا تۇرعىندارىنا الەۋمەتتىك كومەك كورسەتۋ اياسىندا 650 از قامتىلعان جانە كوپ بالالى وتباسىلارعا اتاۋلى الەۋمەتتىك كومەك تاعايىندالىپ، تولەم جۇرگىزىلگەنىن حابارلادى. 

قورعانىس، ەڭبەك جانە حالىقتى الەۋمەتتىك قورعاۋ، دەنساۋلىق ساقتاۋ، يندۋستريا جانە ينفراقۇرىلىمدىق دامۋ، ىشكى ىستەر، سيفرلىق دامۋ، يننوۆاسيالار جانە اەروعارىش ونەركاسىبى مينيسترلىكتەرىنىڭ باسشىلارى الەۋمەتتىك قولداۋ شارالارى، مەديسينالىق قىزمەتتەر كورسەتۋ، تۇرعىن ۇيلەردى قالپىنا كەلتىرۋ بويىنشا جۇرگىزىلىپ جاتقان جۇمىستار تۋرالى باياندادى. 

ءوز كەزەگىندە الماتى وبلىسىنىڭ اكىمى ا. باتالوۆ، اقمولا وبلىسىنىڭ اكىمى ە. مارجىقپايەۆ، اقتوبە وبلىسىنىڭ اكىمى  و. ورازالين، اتىراۋ وبلىسىنىڭ اكىمى ن. نوعايەۆ، شىعىس قازاقستان وبلىسىنىڭ اكىمى د. احمەتوۆ، شىمكەنت قالاسىنىڭ اكىمى ع. ءابدىراحىموۆ بولىنگەن سەكتورلارداعى قۇرىلىس جۇمىستارىنىڭ قارقىنى تۋرالى اقپاراتتاندىردى.

بۇگىندە 676 تۇرعىن ۇيگە جوندەۋ جۇمىستارى اياقتالعان. قازىرگى كەزدە بارلىق سەكتورلار جۇمىستارمەن قامىلعان، 3 040 جەكە تۇرعىن ءۇي قۇرىلىسى مەن كوپقاباتتى تۇرعىن ۇيلەر نىساندارىندا قالپىنا كەلتىرۋ جۇمىستارى جۇرگىزىلۋدە، 190 قۇرىلىس كومپانياسى، 5 مىڭعا جۋىق قۇرىلىسشىلار مەن 207 ارنايى تەحنيكا جۇمىلدىرىلعان. الەۋمەتتىك ينفراقۇرىلىم بويىنشا  جۇمىستار 66 دەنساۋلىق ساقتاۋ، ءبىلىم بەرۋ، سپورت نىساندارىندا جۇرگىزىلىپ جاتىر. 

كەڭەستى قورىتىندىلاعان ق ر پرەمەر-مينيسترى اسقار مامين قالانى قالپىنا كەلتىرۋ جۇمىستارىنا ەلىمىزدىڭ بارلىق وڭىرلەرى، ۇلتتىق كومپانيالار، ءىرى بيزنەس وكىلدەرى بەلسەندى قاتىسىپ جاتقانىن ايتتى. 

«ارىس قالاسىن قالپىنا كەلتىرۋ بويىنشا بارلىق نەگىزگى  جۇمىستار 1 تامىزعا دەيىن اياقتالۋى ءتيىس»، - دەدى اسقار مامين. 

ق ر ۇكىمەتىنىڭ باسشىسى زارداپ شەككەن بيزنەس نىساندارىن، كولىك جانە ينجەنەرلىك ينفراقۇرىلىمدى ۋاقىتىلى قالپىنا كەلتىرۋ جۇمىستارىن كۇشەيتۋدى، مەديسينالىق قامتاماسىز ەتۋ بويىنشا كەشەندى شارالار قابىلداۋدى جانە ءبىلىم بەرۋ نىساندارىن جاڭا وقۋ جىلىنىڭ باستالۋىنا دايىنداۋدى تاپسىردى.