الماتى ءماسليحاتىنىڭ دەپۋتاتتارىمەن كەزدەسۋ كەزىندە قالا اكىمى ب.ساعىنتايەۆ قالانىڭ الەۋمەتتىك-ەكونوميكالىق دامۋىنىڭ ءبىرىنشى جارتىجىلدىقتاعى نەگىزگى قورىتىندىلارى مەن ەكىنشى جارتىجىلدىقتىڭ مىندەتتەرىن تالقىلادى دەپ حابارلايدى Qamshy.kz اقپارات اگەنتتىگى.
VI شاقىرىلىمداعى الماتى قالاسى ءماسليحاتى تۇراقتى كوميسسيالارىنىڭ بىرلەسكەن وتىرىسىن ءماسليحات حاتشىسى قالدىباي قازانبايەۆ اشتى.
كەزدەسۋ بارىسىندا مەگاپوليس اكىمى الماتىنى دامىتۋدىڭ ءبىرىنشى كەزەكتەگى مىندەتتەرى مەن باعىتتارى بويىنشا ءوزىنىڭ بولجامدارىمەن ءبولىستى.
بارلىق ەكونوميكالىق كورسەتكىشتەر بويىنشا دامۋدىڭ وڭ ديناميكاسى ساقتالعان. مىسالى، التى ايدىڭ ىشىندە التى بازالىق سالالاردىڭ (ونەركاسىپ، اۋىلشارۋاشىلىعى، قۇرىلىس، ساۋدا، كولىك، بايلانىس) قىسقا مەرزىمدى ەكونوميكالىق ينديكاتورى 104%-دى قۇراعان. ينۆەستيسيا كولەمى 8%-عا، ءونىم ءوندىرىسى 5،2%-عا، قۇرىلىس 3،9%-عا، تۇرعىن ءۇي سالۋ 2%-عا ءوستى. سالىق جيناۋ 1 ترلن تەڭگەدە اسىپ، 10%-عا ۇلعايدى. شوب سۋبەكتىلەرى شىعارعان ونىمدەر 9،8%-عا كوبەيدى. جالپى، ءبىرىنشى جارتىجىلدىقتىڭ قورىتىندىسى بويىنشا جالپى وڭىرلىك ءونىم شىعارۋ (ءجوو) كەم دەگەندە 3،5%-عا وسەدى دەپ كۇتىلۋدە.
الايدا، ب.ساعىنتايەۆ قالادا شەشىمىن كۇتكەن ماسەلەلەردىڭ جەتكىلىكتى ەكەنىن اتاپ ءوتتى.
«پروبلەمالار بارىمىزگە تانىس. ول - لايىقتى جالاقىسى بار جۇمىس ورىندارىنىڭ جەتىسپەيتىندىگى. ءبىرىنشى كەزەكتە قاجەت ازىق-تۇلىك باعالارىنىڭ ءوسۋى، كوممۋنالدىق قىزمەت باعالارىنىڭ قىمباتتاۋى، تۇرعىن ءۇيدىڭ جوقتىعى، ەكولوگيا، مەديسينالىق قىزمەت ساپاسى مەن قوعامدىق قاۋىپسىزدىك. قالالىقتار بىزدەن ءادىل شەشىمدەر مەنى ءتيىمدى ءىس-قيمىلداردى كۇتۋدە. ءبىز تۋرا وسى باعىتتا جۇمىس جاسايتىن بولامىز. جەدەل ءارى جوعارى جاۋاپكەرشىلىكپەن. قالا قوعامداستىعىمەن اقىلداسا وتىرىپ»، - دەپ اتاپ ءوتتى الماتى اكىمى.
ب.ساعىنتايەۆ مەگاپوليستى دامىتۋ پەرسپەكتيۆالارىنا توقتالدى، مۇنداعى باستى ماقسات - قالالىقتاردىڭ تابىس دەڭگەيىن كوتەرۋ، ءومىر ءسۇرۋ ساپاسىن جاقسارتۋ.
اكىم الماتىنى «شەتسىز قالا» قاعيداسى بويىنشا دامىتۋ قاجەت ەكەندىگىن اتاپ ءوتتى. «ورتالىق پەن شەت ايماقتى دامىتۋداعى ديسبالانستى جويۋ قاجەت، بۇل - ءپرينسيپتى ماسەلە. شەتتەگى ادامدار ورتالىق تۇرعىندارى سياقتى ساپالى قىزمەت تۇرلەرىن الۋلارى ءتيىس» - دەپ اتاپ ءوتتى الماتى اكىمى.
سيفرلارعا كوز جۇگىرتىپ وتەلىك: سوڭعى بەس جىل ىشىندە قالانىڭ ورتالىق اۋداندارىنىڭ اۋماقتارىن اباتتاندىرۋ ءۇشىن 65 ملرد تەڭگە كۇردەلى قارجى جۇمسالعان، ال شەتتەگىلەرگە بولىنگەنى 15،5 ملرد تەڭگە عانا. سونىڭ سالدارىنان شەت ايماقتار تۇرعىندارى ومىرلىك قاجەتتى ينفراقۇرىلىمدار – ورتالىقتاندىرىلعان سۋ، گاز جەلىلەرىنىڭ، كوشە جارىعىنىڭ جوقتىعىن ايتىپ شاعىمدانۋدا. مۇنداعى جولدىڭ ساپاسى دا تومەن، اۆتوبۋس باعىتتارى جەتكىلىكسىز.
«جاعدايدى تۇبەگەيلى وزگەرتۋ قاجەت»، - دەپ اتاپ ءوتتى الماتى اكىمى.
«ءبىزدىڭ ماقساتىمىز - تاياۋداعى ءۇش جىل ىشىندە جاعدايدى تۇبىرىنەن وزگەرتىپ، قالانىڭ شەت ايماعىنداعى ءومىر ءسۇرۋ دەڭگەيىن ارتتىرۋ. جۇمىس ورىندارىن قۇرۋ، ەسكى ۇيلەردى ءسۇرۋ، الەۋمەتتىك نىسانداردى سالۋ، اباتتاندىرۋ، شاعىن جانە ورتا بيزنەستى ىنتالاندىرۋ بويىنشا اۋقىمدى باعدارلامالار ازىرلەۋ قاجەت»، - دەپ باسا كورسەتتى ب.ساعىنتايەۆ.
قالا باسشىسىنىڭ تاپسىرماسى بويىنشا اۋدان اكىمدىكتەرى 1 تامىزعا دەيىن جەرگىلىكتى تۇرعىنداردى تولعاندىراتىن ماسەلەلەردى جەدەل شەشۋ بويىنشا ناقتىلى جوسپارلاردى ازىرلەيتىن بولادى.
ب.ساعىنتايەۆ مەگاپوليستەگى ورىن العان پروبلەمالاردى شەشۋ ءۇشىن بيۋدجەت ساياساتىنىڭ تيىمدىلىگى ارتاتىنىن اتاپ ءوتتى. سونىڭ ارقاسىندا قالانى ورتالىقتاندىرىلعان سۋ، گاز جەلىلەرىمەن، جارىقپەن تولىعىمەن قامتاماسىز ەتۋ جوسپارلانعان. وسى كەزەڭ ىشىندە اۋلالاردى اباتتاندىرۋ دا اياقتالۋى ءتيىس.
بۇعان قوسا، الدا قوعامدىق كولىكتى جاڭارتۋ، وقۋشى ورىندارىنىڭ جەتىسپەۋشىلىگىن ازايتۋ، پيك-تەر مەن باسقارۋشى كومپانيالاردىڭ، قالا اكىمدىكتەرى مەن باسقارمالارى جۇمىستارىنىڭ اشىقتىعى مەن تيىمدىلىگىن ارتتىرۋ مىندەتتەرى تۇر. سونىمەن قاتار، بۇۇ ۇسىنىسىنا سايكەس بيۋدجەتتىڭ «حالىقتىڭ قاتىسۋى» مەحانيزمىن ەنگىزۋ جوسپارلانعان.
كەزدەسۋ بارىسىندا ءماسليحات دەپۋتاتتارى ۆلاديسلاۆ لي، مارات ابدۋللايەۆ، ەربولات كاسىموۆ، ءلاززات قالتايەۆا، كەنجەحان ماتىجانوۆ، سەرگەي كوزلوۆ جانە مۇرات ءادىلحانوۆ ۇسىنىستارىن ايتتى جانە دامۋدىڭ اكتۋالدى ماسەلەلەرىن كوتەردى.
پىكىر قالدىرۋ