ءبىلىم جانە عىلىم ءمينيسترى اسحات ايماعامبەتوۆ قوسىمشا 5 000 گرانتتى تاراتۋ جايىندا ايتىپ بەردى دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ. 

ءمينيستردىڭ ايتۋىنشا، قوسىمشا گرانتتار تەك ەكى ساناتقا جاتاتىن جاستارعا بەرىلەدى. ولار - كوپبالالى وتباسىدان شىققاندار مەن اتاۋلى الەۋمەتتىك كومەك الاتىندار.

"ولار الدىمەن جالپى كونكۋرسقا قاتىسا الادى. بيىل وعان 53 مىڭ گرانت ءبولىنىپ وتىر. سونىڭ اياسىندا گراتتار ادەتتەگىدەي ۇلتتىق ءبىرىڭعاي تەستىلەۋدەن العان ۇپاي سانى بويىنشا تاراتىلادى. ودان وتە الماسا، تامىزدىڭ باسىندا جەرگىلىكتى اتقارۋشى ورگاندارعا ءوتىنىش بەرۋگە بولادى. بۇگىندە قوسىمشا گرانتتاردىڭ اقشاسى اكىمدىكتەرگە تولىعىمەن ءبولىندى"، - دەدى ايماعامبەتوۆ جۋرناليستەرگە بەرگەن سۇحباتىندا.

ونىڭ سوزىنە قاراعاندا، اكىمدىككە كوپبالالى وتباسىدان شىققانى، يا بولماسا اتاۋلى الەۋمەتتىك كومەك الاتىنى تۋرالى قۇجاتتار تاپسىرۋ قاجەت. ودان كەيىن ۇلتتىق ءبىرىڭعاي تەستىلەۋدىڭ كۋالىگىن وتكىزۋى كەرەك. ۇمىتكەرلەردى ىرىكتەگەندە ۇپاي سانى ەسكەرىلەدى.

"ماسەلەن، پەداگوگيكاعا قوسىمشا 100 گرانت ءبولىندى دەيىك. وعان رەسپۋبليكا بويىنشا 200 ادام تالاسسا، گرانتتىڭ 100 يەگەرىن ۇلتتىق ءبىرىڭعاي تەستىلەۋدىڭ قورىتىندىسى بويىنشا انىقتايدى. ۇپايدىڭ شەكتى سانىن دا جيناۋى دا مىندەتتى"، - دەپ اتاپ كورسەتتى ايماعامبەتوۆ.

ايتا كەتسەك، نەگىزگى 53 785 گرانتقا تۇلەكتەر 21-31 شىلدە ارالىعىندا رەسپۋبليكالىق كونكۋرسقا قاتىسىپ، باعىن سىنايدى. ال سول جالپى كونكۋرس بويىنشا گرانتقا يە بولماعان كوپبالالى وتباسىدان شىققان جانە اتاۋلى الەۋمەتتىك كومەك الۋشىلار ساناتىنداعى تالاپكەرلەر قوسىمشا بولىنگەن 5 مىڭ گرانتتى الۋ ءۇشىن تامىز ايىنىڭ 5-10 ارالىعىندا كەلەسى كونكۋرسقا قاتىسۋعا جەرگىلىكتى اتقارۋشى ورگاندارعا ءوتىنىش بەرۋى ءتيىس.

جەڭىمپازداردىڭ ءتىزىمى جەرگىلىكتى بۇقارالىق اقپارات قۇرالدارىندا جاريالانادى. گرانت يەگەرلەرىنە ادەتتەگىدەي 20 949 تەڭگە كولەمىندە ستيپەنديا تاعايىندالماق. سونىمەن قاتار دەمالىس كەزىندە جىلىنا ەكى رەت جول ءجۇرۋ وتەماقىسى تولەنەدى.