29 شىلدەدە قوستانايداعى كوشەلەردىڭ بىرىنە نۇرسۇلتان نازاربايەۆتىڭ ەسىمىن بەرۋگە بايلانىستى قوعامدىق تىڭداۋ وتەدى. سەبەبى، قالا اكىمى قايرات احمەتوۆتىڭ اتىنا باستاماشىل توپ بىرنەشە رەت ءوتىنىش حات جازعان دەپ حابارلايدى Qamshy.kz اقپارات اگەنتتىگى قازاقپارات سايتىنا سىلتەمە بەرىپ.
قوستانايداعى اۆتوموبيل ترانسپورتى كوللەدجىنىڭ پەداگوگتارى مەن ستۋدەنتتەرى بار باستاماشى توپ گاگارين كوشەسىن ق ر تۇڭعىش پرەزيدەنت اتىنداعى داڭعىلعا اينالدىرۋ جونىندە ۇجىمدىق حات جازعان. بۇعان قوسا ولار گۆاردەيسكيي كوشەسىن گاگارين كوشەسىنە اۋىستىرۋدى ۇسىنعان.
"ق ر پرەزيدەنتى ق.توقايەۆ تۇڭعىش پرەزيدەنتىمىز ن.نازاربايەۆتىڭ ەسىمىن وبلىس ورتالىقتارىنداعى كوشەلەردىڭ بىرىنە بەرۋ تۋرالى باستاما كوتەرگەن بولاتىن. ەلباسىنىڭ ستراتەگيالىق باستامالارى ارقاسىندا قازاقستان ينتەگراسيالىق ۇدەرىستەردىڭ باستى لوكوموتيۆىنە اينالدى. رەسپۋبليكامىز ءىرى جانە بەدەلدى حالىقارالىق ۇيىمداردىڭ بەلسەندى قاتىسۋشىسى سانالادى. قازاقستان الەمنىڭ ەڭ دامىعان 30 ەلىنە كىرۋ پروسەسىندە كاسىپقوي كادرلاردى دايارلاۋ ءىسىن ماڭىزدى فاكتورلاردىڭ ءبىرى رەتىندە سانايدى. نۇرسۇلتان نازاربايەۆ ەكونوميكانى قاجەتتى ەڭبەك رەسۋرستارىمەن قامتاماسىز ەتۋ ماسەلەسىندە تەحنيكالىق جانە كاسىپتىك ءبىلىم بەرۋدى دامىتۋعا ەرەكشە ءمان بەردى. ءبىزدىڭ كوللەدج گاگارين كوشەسىندە ورنالاسقان. يۋريي گاگارين – عارىشقا ۇشقان العاشقى ادام. الەمدەگى العاشقى عارىشكەردىڭ اتى ۇمىتىلمايدى"،- دەلىنگەن باستاماشىل توپتىڭ حاتىندا.
كوللەدجدىڭ ۇسىنىسىن نازاربايەۆ زياتكەرلىك مەكتەبى، "اگروماشحولدينگ" كاسىپورنى، ورتالىق ستاديون باسشىلىعى جانە باسقا دا كوپتەگەن ۇجىمدار ءبىراۋىزدان قولدادى. بەلسەندىلەر يۋريي گاگارين ەسىمىن گۆاردەيسكيي كوشەسىنە كوشىرۋ تۋرالى ۇسىنىستى ماڭىزدى دەپ ەسەپتەيدى.
بۇل ماسەلەلەرگە قاتىستى قوعامدىق تىڭداۋ 29 شىلدە كۇنى وتەدى.
پىكىر قالدىرۋ