بەلگىلى بيزنەسمەن قايرات بورانبايەۆ اقىلى اۆتوتۇراقتاردى باسقاراتىن «الماتى سپەستەحپاركينگ سەرۆيس» كومپانياسىنىڭ 70 پايىزدىق ۇلەسىن يەلەندى، forbes.kz.

«الماتى سپەستەحپاركينگ سەرۆيس» ءجشس-نىڭ قالعان 30 پايىزدىق ۇلەسى الماتى قالاسى اكىمدىگىنە تيەسىلى.

قايرات بورانبايەۆ McDonald’s قازاقستان، رەسەي، بەلارۋس فرانچايزينگىلەرىنىڭ، مينەرالدىق سۋسىن وندىرەتىن «الەكس» ءجشس-نىڭ، «راحات پالاس»، Comfort Hotel Astana قوناق ۇيلەرىنىڭ، Fitnation فيتنەس كلۋبتارى جەلىسىنىڭ يەسى. سونداي-اق Esentai Mall، Esentai Tower ساۋدا ۇيلەرى اكسيالارىنىڭ جارتىسىنا يەلىك ەتەدى. بورانبايەۆ – ۇلتتىق پاراليمپيادا كوميتەتىنىڭ پرەزيدەنتى، «قايرات» فۋتبول كلۋبى باقىلاۋ كەڭەسىنىڭ ءتوراعاسى. «قازاقستان گولف فەدەراسياسى» رەسپۋبليكالىق قوعامدىق بىرلەستىگىنىڭ تەڭ قۇرىلتايشىسى. قازاقستاننىڭ 50 باي بيزنەسمەندەرى تىزىمىندە 13-ورىنعا، 50 ىقپالدى بيزنەسمەندەرى تىزىمىندە 10-ورىنعا جايعاسقان. ونىڭ بايلىعى بۇگىندە $445 ملن-عا باعالانىپ وتىر.