اسكەري شولۋشى الەكساندر حرولەنكو رەسەيدىڭ قازاقستانعا قانداي قارۋ-جاراق تاسىمالدايتىنى تۋرالى ايتىپ بەردى دەپ حابارلايدى Qamshy.kz اقپارات اگەنتتىگى. 

ستوكگولم حالىقارالىق الەمدىك ماسەلەلەردى زەرتتەۋ ينستيتۋتىنىڭ (SIPRI) بايانداماسىنا سۇيەنسەك، رەسەيدىڭ قورعانىس ونىمدەرى ساۋداعا تۇسەتىن ءىرى نارىقتار – ءۇندىستان (27%) جانە جۇڭگو (14%)، ال پوستكەڭەستىك كەڭىستىكتە – ازەربايجان، بەلارۋس جانە قازاقستان.

"ۆەرتولەتى روسسيي" حولدينگى جىل باسىندا "قازاقستان ينجينيرينگ" كومپانياسى جانە №405 اۆياسيالىق جوندەۋ زاۋىتىمەن بىرگە كەلىسىمشارت جاساسىپ، سوعان سايكەس قازاقستاندا مي-8امت جانە مي-171 تىكۇشاقتارى قۇراستىرىلاتىن بولدى. رەسەيلىك تىكۇشاقتاردىڭ مىقتى ساپاسى مەن بەرىكتىگى بۇكىل الەمگە ايگىلى. قازاقستاندا رەسەيدىڭ 200-گە تارتا اسكەري جانە ازاماتتىق تىكۇشاقتارى قولدانىلىپ ءجۇر.

سونىمەن قاتار قازاقستان اۋماعىندا يل-103م جاڭارتىلعان كوپماقساتتى جەڭىل ۇشاعىنىڭ ءوندىرىسى قولعا الىنباق. ءتيىستى كەلىسىمگە س.ۆ. يليۋشين اتىنداعى اۆياسيا كەشەنى مەن قازاقستاندىق اۆياسيا زاۋىتى قول قويدى. بىرلەسكەن كاسىپورىن 2019 جىلى ىسكە كىرىسەدى، ال 2022 جىلدان باستاپ ءونىم تاسىمالدانادى.

كەڭەس وداعى ىدىراعاننان كەيىن قازاقستاننىڭ قورعانىس ونەركاسىبى كەشەنىنە 196 كاسىپورىن مۇراعا قالدى. مۇندا كەڭەستىك تورپەدالار، زىمىراندار، زىمىرانعا قارسى قورعانىس جۇيەلەرى، تانكتەرگە قارۋلاندىرۋ، بارلاۋ جۇيەلەرى، راديوەلەكتروندى قۇرىلعىلار، ارتيللەريالىق جۇيەلەر مەن جاياۋ اسكەردىڭ جاۋىنگەرلىك كولىكتەرى شىعارىلاتىن. قازىردە رەسەي مەن قازاقستاننىڭ اسكەري-تەحنيكالىق ىنتىماقتاستىعى قارۋ-جاراق تاسمىلداۋشىلارىن ءارتاراپتاندىرۋ ساياساتىنا قاراماستان ستراتەگيالىق سەرىكتەستىككە اينالدى.

رەسەي مەن قازاقستان اراسىنداعى جىلدىق تاۋار اينالىمى 18 ميلليارد دوللارعا جەتىپ وتىر. اسكەري ونىمدەردىڭ ءوزارا تاسىمالى، قارۋ-جاراق پەن اسكەري تەحنيكاعا قىزمەت كورسەتۋ جانە جوندەۋ، بىرلەسكەن عىلىمي-زەرتتەۋ جانە تاجىريبەلىك جۇمىستار، بىرلەسكەن قورعانىس ونەركاسىبى كەشەنى كاسىپورىندارى، اسكەري جانە اسكەري-تەحنيكالىق كادردى دايىنداۋ شارالارى تۋرالى بەلگىلى بولعانىمەن، جالپى العاندا رەسەي مەن قازاقستان اراسىنداعى اسكەري-تەحنيكالىق ىنتىماقتاستىقتىڭ قارجى ماسەلەسى قۇپيا بولىپ سانالادى.