جەر داۋى بۇل كۇندەرى قايتادان ءجيى تالقىلاناتىن تاقىرىپتاردىڭ ءبىرى بولىپ بارادى. كۇنى كەشە پرەمەر-مينيسترىنىڭ ورىنباسارى جەڭىس قاسىمبەك جەر ماسەلەسىندەگى موراتوريي جاريالانعان باپتاردى قاراۋ ۇلتتىق قوعامدىق سەنىم كەڭەسىنە تاپسىرىلاتىنىن ءمالىم ەتتى. ال الەۋمەتتىك جەلىدە "جەر شەتەلدىكتەرگە جالعا بەرىلەدى، ساتىلادى-مىس" دەگەن اڭگىمەلەر جەلدەي ەسۋدە. سونىڭ ءبىرىن "الاش جولى" جالپىحالىقتىق قوزعالىسىنىڭ جەتەكشىسى ماقسات ءىلياس ۇلى ءوزىنىڭ فەيسبۋكتاعى پاراقشاسىندا جازىپ ءجۇر. وسى ورايدا "قامشى" ءتىلشىسى ماقسات ىلياسۇلىمەن حابارلاسىپ، ءمان-جايدى سۇراعان بولاتىن.
– فەيسبۋكتاعى "شەتەلدىك ينۆەستورلارعا جەر جالعا دا، جەكە مەنشىككە دە بەرىلۋى مۇمكىن" دەگەن جازباڭىز قىزۋ تالقىلانۋدا. بۇل مالىمدەمەلەرىڭىزدىڭ قاندايدا ءبىر زاڭدىق نەگىزى بار ما؟
– مۇنىڭ كەم دەگەندە ەكى زاڭدىق نەگىزى بار. جەردى شەتەلدىكتەرگە جالعا بەرۋدى، جەكەمەنشىككە ساتۋدى كوزدەيتىن داۋلى 23-باپ جەر كودەكسىنەن ءالى كۇنگە دەيىن الىنىپ تاستالعان جوق. بۇل ءبىرىنشىسى. ال ەكىنشىسى – ينۆەستيسيالىق جوبالارعا جەر كونكۋرسسىز بەرىلەدى دەگەن ارنايى ەرەجە.
– ءسىز ايتقان داۋلى باپتارعا موراتوريي جاريالانعان. پرەزيدەنت ونىڭ مەرزىمى بىتەتىن 2021 جىلدىڭ جەلتوقسانىنا دەيىن تۇپكىلىكتى شەشىم قابىلداناتىنىن، جەر شەتەلدىكتەرگە ساتىلمايتىنىن ايتتى. بۇعان نە دەيسىز؟
– ۇكىمەتتىڭ جۋىرداعى بىرلەسكەن وتىرىسىندا توقايەۆتىڭ ايتقان بۇل سوزدەرىن ءبارى ەستىدى. دەسە دە وعان دەيىن ءالى ۋاقىت بار. بيلىكتىڭ نەندەي قۋلىق ويلاپ تاباتىنىن بولجاپ بولمايسىڭ. جەر ماسەلەسىمەن شۇعىلدانىپ جۇرگەن مۇحتار تايجان دا بيلىكتىڭ ايتقانىن قايتالاپ ءجۇر. زاڭ قابىلدانعانعا دەيىن ولاردىڭ ەشقايسىسىنا سەنۋگە بولمايدى.
– ال ارنايى ەرەجە دەپ وتىرعانىڭىز قانداي ەرەجە؟
– ول جوعارىدا ايتقانىمداي، ينۆەستيسيالىق جوبالارعا جەردى كونكۋرسسىز بەرۋدى كوزدەيدى. ۇكىمەت جۋىردا پرەزيدەنتتەن "Kazakh invest" ۇلتتىق كومپانياسىمەن بىرلەسىپ الداعى 3 جىلدىڭ ىشىندە اگروونەركاسىپ كەشەنىنە ءىرى شەتەلدىك كورپوراسيالاردى تارتۋ تۋرالى تاپسىرما الدى. ىزىنشە، اۋىل شارۋاشىلىعى مينيسترلىگى "Kazakh invest" ۇك-مەن كەزدەسۋ وتكىزىپ، ينۆەستيسيالىق جوبالاردى تارتۋ ماسەلەسىن تالقىلادى. الماتى وبلىسىنىڭ ينۆەستيسيالىق پورتالىنا (http://invest.alm-reg.kz/kz/Investoru/Zerd_alu/) كىرسەڭىز جەر ۋچاسكەلەرىن ءبولۋدىڭ ەرەجەسى تاپتىشتەپ جازىلعان. وندا بىلاي دەيدى:
"جەر ۋچاسكەلەرىن الۋ جانە ينۆەستيسيالىق جوبالاردى ىسكە اسىرۋ بارىسىندا جەر قويناۋىن پايدالانۋ قۇقىعىن ايماقتىق دارەجەدە الۋ ماقساتىندا مەملەكەتتىك كومەك تۇرلەرىن الۋ ءۇشىن وڭىرلىك ۇيلەستىرۋ كەڭەسىنىڭ (ارى قاراي وۇك) شەشىمى نەگىزىندە جوبانى ينۆەستيسيالىق دەپ تانۋ كەرەك.
بۇل جاعدايدا وۇك-نىڭ وڭ شەشىمى بەرىلسە، ينۆەستيسيالىق جوباعا جەر ۋچاسكەسىن ءبولۋ بايقاۋعا قاتىسپاي-اق تىكەلەي كەلىسىم ارقىلى جۇرگىزىلەتىنىن اتاپ وتكەن ءجون".
"الاش جولى" جالپىحالىقتىق قوزعالىسىنىڭ جەتەكشىسى ماقسات ىلياسۇلىمەن سۇحبات وسىلاي ءوربىدى. اڭگىمە بارىسىندا ايتىلعان الماتى وبلىسىنىڭ ينۆەستيسيالىق پورتالىنداعى دەرەكتەر انىقتالىپ، قوسىمشا حابارلانادى.
پىكىر قالدىرۋ