عابيدوللا ءابدىراحىموۆتىڭ شىمكەنت قالاسى اكىمى لاۋازىمىنان بوساۋىن جۋىردا لوندون كوشەلەرىنىڭ بىرىندە ءجۇرىپ تۇسىرگەن داۋلى ۆيدەوسىمەن بايلانىستىرىپ جاتقاندار كوپ. بۇل ءابدىراحىموۆتىڭ قوعامدا ءجيى تالقىلانعان العاشقى مالىمدەمەسى ەمەس، دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ. سولاردىڭ كەيبىرىن ەسكە ءتۇسىرۋدى ءجون كوردىك.

"ايەلدەرىڭە يە بولىڭدار!"

ارىستاعى جارىلىستان كەيىن ميتينگىگە شىققان تۇرعىنداردىڭ الدىنا كەلگەن شىمكەنت اكىمى ەر ادامداردى ايىپتاعان بولاتىن. "مەن ەركەكتەرگە رەنجىپ وتىرمىن. ايەلدەر ايقايلايدى، سويلەي بەرەدى. ال ەركەكتەرگە نە جوق؟ ءبىرىنشى، ءوز ايەلدەرىڭە يە بولىڭدار! سودان كەيىن ەل تۋرالى ايتىڭدار. وزدەرىڭ ايەلدەرىڭە يە بولا الماي، ماعان كەلىپ اڭگىمە ايتاسىڭدار"، – دەپ شەرۋگە شىققاندارعا اشۋلانعان ەدى.

"وتانىڭ مەن اناڭدى تاڭداي المايسىڭ"

بىلتىر قاراشادا ءابدىراحىموۆ قازاقستاندىقتاردان وتانىن باسقا مەملەكەتتەرمەن سالىستىرماۋىن سۇراعان بولاتىن. "ءقازىر مەن باسپاسوزدەن مىنانى وقيمىن – امەريكادا بىلاي، ەۋروپادا بىلاي، بىزدە نەگە ولاي ەمەس. مەن سىزدەرگە ايتايىن، بىزدە ولارعا قاراعاندا الدەقايدا جاقسى، ەركىن ءومىر، بىزدە رۋحاني دۇنيە بار. وسىنى ساقتاپ قالۋ كەرەك. وتانىڭ مەن اناڭدى تاڭداي المايسىڭ. سىزدەر كوشەدە ءجۇرىپ "مىنا ايەل ادەمىرەك ەكەن، مەن وسىنى انامنىڭ ورنىنا تاڭدايمىن" دەمەيسىزدەر عوي، – دەدى اكىم.

"حالىق ايەل سەكىلدى"

بىلتىر، تاعى سول قاراشادا ءابدىراحىموۆ نۇر-سۇلتاندا ورتالىق كوممۋنيكاسيالار قىزمەتىندە وتكەن بريفينگتە حالىقتى ايەلگە تەڭەيتىنىن ايتقان بولاتىن.

 "مەن حالىقتى ايەلگە تەڭەيمىن. حالىق ايەل سياقتى. وزدەرىڭىز دە بىلەسىزدەر، ايەل قامقورلىقتى، ماحابباتتى قالايدى. جىلۋلىق قالايدى، وزىنە كوڭىل اۋدارعانىن جاقسى كورەدى. ەگەر وعان وسىنىڭ بارلىعىن دەر كەزىندە بەرمەسەڭ، ولار كوتەرىلىس جاساۋى دا عاجاپ ەمەس. حالىقپەن دە تۋرا سونداي قارىم-قاتىناس جاساۋ كەرەك"، – دەگەن ەدى ءابدىراحىموۆ.

"شىمكەنت قالاسى - زىڭ"

2017 جىلى شىمكەنت قالاسىنىڭ تۋعان كۇنىن اتاپ ءوتىپ جاتقاندا "قىزىق Times" شوۋى كونسەرت وتكىزىپ، ساحناعا عابيدوللا ءابدىراحىموۆ شىققان. سول كەزدە جۇرگىزۋشىلەر قالا باسشىسىنان شىمكەنتتى ءبىر سوزبەن سيپاتتاپ بەرۋدى سۇرايدى. وسى كەزدە عابيدۋللا ءابدىراحىموۆ "شىمكەنت قالاسى – زىڭ" دەپ قالجىڭداعان.