قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆ قازاقستاندا كاسىپوداق قوزعالىسىن دامىتۋعا ۇلەس قوسقانى ءۇشىن ماراپات الدى دەپ حابارلايدى Qamshy.kz اقپارات اگەنتتىگى sputniknews.kz سايتىنا سىلتەمە جاساپ. 

قازاقستان رەسپۋبليكاسى كاسىپوداقتار فەدەراسياسىنىڭ مالىمەتىنشە، جوعارى كاسىپوداق ماراپاتىن قۇرۋ تۋرالى شەشىمدى مەملەكەتتىك، بانك مەكەمەلەرى جانە قوعامدىق قىزمەت كورسەتۋ قىزمەتكەرلەرى سالالىق كاسىپوداعى ورتالىق كوميتەتىنىڭ پرەزيديۋمى قابىلداعان.  

"كاسىپوداق قوزعالىسىن دامىتۋعا، قازاقستان رەسپۋبليكاسى پرەزيدەنتى اكىمشىلىگىنىڭ باستاۋىش كاسىپوداق ۇيىمىن قۇرۋعا جانە ساقتاۋعا، مەملەكەتتىك قىزمەتشىلەردىڭ سالالىق كاسىپوداعىن نىعايتۋعا قوسقان زور ۇلەسى ءۇشىن جانە كاسىبي مەرەكە – مەملەكەتتىك قىزمەتشىلەر كۇنىنە وراي قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازاربايەۆتى "مەملەكەتتىك، بانك مەكەمەلەرى جانە قوعامدىق قىزمەت كورسەتۋ قىزمەتكەرلەرىنىڭ سالالىق كاسىپوداعى" قوعامدىق بىرلەستىگىنىڭ "كاسىپوداق قايراتكەرى" №001 مەدالىمەن ماراپاتتاۋ تۋرالى شەشىم قابىلداندى"، - دەپ حابارلادى ۇيىمنىڭ باسپا ءسوز قىزمەتى.

كاسىپوداق ماراپاتى ەلباسى كەڭسەسىنىڭ باسشىسى ماحمۇد قاسىمبەكوۆكە تاپسىرىلدى.